Nënkryetari i Partisë Demokratike të Kosovës, Enver Hoxhaj, në një intervistë dhënë për RTK-në, ka detajuar planin e këtij subjekti politik si ofertë për votuesit e 9 shkurtit.
Hoxhaj ka nënvizuar se nuk do të bashkëpunojnë me Lëvizjen Vetëvendosje pas zgjedhjeve për ndonjë koalicion të mundshëm. Ai ka lënë të hapur mundësitë për partitë e tjera.
“Ne e kemi parë më të domosdoshme që ta përcjellim mesazhin kryesor te qytetari, se cili është programi ynë dhe vet figura e Bedri Hamzës nuk është figurë polarizuese, përçarëse. Në kuptimin e një bashkëpunimi pas zgjedhjeve, i themi një jo të madhe Lëvizjes Vetëvendosje. Nuk shohim pikë-takime të mundshme. Ndërsa s’e përdorim formulimin e vijave të kuqe, por një jo të madhe dhe të qartë e shohim. Garojmë në këto zgjedhje për ta marrë pozitën e parë si parti politike, për ta bërë Bedri Hamzën kryeministër. Por pas zgjedhjeve do të ulemi me partitë e tjera opozitare, për ta rikthyer vendin në binar”, ka thënë Hoxhaj.
Hoxhaj ka theksuar se katër shtyllat e plan-programit të tyre mbështeten në ekonomi, arsim, shëndetësi dhe në politikë të jashtme.
“Ne kemi një kandidat për kryeministër që vjen nga ekonomia, dhe temë e shqetësim kryesor për qytetarët është ekonomia. Ne kemi menduar që me Bedri Hamzën, që është ekonomisti më i mirë në Kosovë, ne do të mund ta marrim votën e elektoratit, por mbi të gjitha që ta krijojmë një kontratë të re me ta”, ka thënë ai në intervistën zgjedhore në RTK.
Ai ka thënë se plani i PDK-së është të arrijnë zhvillimin ekonomik përmes investimit në sektorin privat, por edhe nëpërmjet rritjes së pagave në sektorin publik. Hoxhaj ka premtuar se rritja e pagave do të ndodhë gjatë mandatit të parë të udhëheqjes së PDK-së.
“Ne mendojmë që duhet të mbështeten nënat lehona. Ka shumë komuna të Kosovës ku ka probleme serioze nëse dikush dëshiron ta dërgojë fëmijën në çerdhe. Ne mendojmë që çdo familje, për çdo fëmijë që dërgon në çerdhe private, duhet të ketë mbështetje prej 100 eurosh. Mbi të gjitha, mendojmë që përtej mbështetjes që duhet të ofron shteti, ne duhet të bëjmë përpjekje maksimale se si këta njerëz t’i kyçim në tregun e punës dhe përmes reformave ekonomike dhe arsimore, kemi propozime konkrete që do të ndodhin”, ka premtuar ai.
Hoxhaj ka theksuar se politika e jashtme do të fokusohet në ardhjen e njohjeve të reja dhe përpjekjet më intensive për anëtarësim në NATO. Ai ka thënë se në fokus do të jenë edhe qasja më proaktive e raporteve me rajonin, duke përfshirë shtetet e Ballkanit Perëndimor.
Plani i PDK-së në raport me arsimin është që shkollat të shndërrohen në shkolla digjitale, mësimi të jetë tërë ditor, duke mos qenë i fokusuar vetëm në aspektin e nxënies, por edhe shtimin e zonave kreative që ngrisin shkathtësitë për jetë.
“Ne mendojmë që duhet të largohen librat dhe të zëvendësohen me laptopë, tableta. Duhet të ketë ‘smart board’ në çdo klasë dhe Microsoft 365 që përdoret për mësimdhënie. Mësimi duhet të kalojë gradualisht në digjital. Njëri prej debateve më të rëndësishme është kjo: nëse shkollat nuk kthehen në shkolla digjitale, do të krijohet një hendek i dijes mes atyre që do ta përdorin teknologjinë e Inteligjencës Artificiale në sistemin arsimor dhe atyre që s’dinë ta përdorin”, ka thënë nënkryetari i PDK-së.
