Policia e stacionit në Shtime njofton se më 29.01.2025, rreth orës 20:45, ka pranuar një informacion lidhur me një rast të dyshuar rrëmbimi, i cili thuhej se kishte ndodhur në rrugën magjistrale Ferizaj – Shtime.
Njësitet policore të rendit dhe hetuesit kanë reaguar duke shkuar në vendin e ngjarjes.
“Fillimisht, dyshohej se persona të panjohur kishin rrëmbyer një qytetar dhe e kishin dërguar në fshatin Jezerc, Ferizaj. Për këtë arsye, rasti ishte cilësuar si “Privim i kundërligjshëm i lirisë”. Gjatë hetimeve dhe sigurimit të provave të mjaftueshme, hetuesit policorë kanë arritur të zbulojnë se deklarimet për rastin nuk ishin të vërteta, njofton zyra për informimit e Drejtorisë Rajonale e Policisë në Ferizaj.
Bëhet e ditur se për pasojë, sot, janë shoqëruar në cilësinë e të dyshuarve dy persona, të cilët dyshohet se kanë inskenuar rastin: H.L. (M/K), 21 vjeç dhe E.S. (M/K), 24 vjeç
Gjithashtu bëhet e ditur se pas intervistimit nga hetuesit policorë, me vendim të prokurorit, rasti është rikualifikuar si “Lajmërim apo kallëzim i rremë”. Hetimet për rastin do të vazhdojnë në koordinim me organet e drejtësisë.
