FRIEDRICH Merz, favoriti për të qenë kancelari i ri gjerman, ka shprehur shqetësimin për drejtimin që po ecin Shtetet e Bashkuara në mandatin e dytë të Donald Trump, raporton Politico.
Kandidati gjerman për kancelar iu drejtua turmës në një tubim në Singen të mërkurën në mbrëmje, duke theksuar se ndryshimet në administratën amerikane ishin shqetësuese. “Kjo nuk është më Amerika që ne e dinim,” tha Merz, duke iu referuar ndryshimeve të mëdha të personelit dhe institucional në administratën Trump.
“Mënyra se si po zëvendësohen zyrtarët, si po ndryshojnë strukturat e Ministrisë së Drejtësisë dhe prokuroritë e shtetit, si po shpërndahen faljet në masë për njerëzit e dënuar me shumë vite dënime – e gjithë kjo do të ketë pasoja për Amerikën,” paralajmëroi Merz.
Spastrimet masive
Paralajmërimet e Merz vijnë mes pushimeve dhe shkurtimeve masive në administratën amerikane, si dhe në sektorin e ndihmës së huaj, që kur Trump mori detyrën përsëri si president. Administrata e tij u dërgoi email punonjësve të qeverisë duke u ofruar atyre “dorëheqje të shtyra”, hoqi inspektorë të shumtë federalë dhe shkarkoi dhjetëra prokurorë të lidhur me ndjekjen penale të rasteve në lidhje me sulmin e 6 janarit 2021, në Kapitol.
Përveç kësaj, SHBA ka ngrirë ndihmën e huaj dhe ka njoftuar planet për të dërguar pothuajse të gjithë punonjësit e Agjencisë së Shteteve të Bashkuara për Zhvillim Ndërkombëtar (USAID) në pushim me pagesë.
Trump ka njoftuar gjithashtu ambiciet për të marrë kontrollin e Rripit të Gazës, Grenlandës dhe Kanalit të Panamasë, duke mos përjashtuar mundësinë e përdorimit të forcës ushtarake.
Elon Musk mbështet hapur AfD, Merz e quan atë “pretencioz”
Gjermania do të mbajë zgjedhje të parakohshme më 23 shkurt dhe Merz po kërkon të ruajë epërsinë e tij në sondazhe ndaj partisë së krahut të djathtë Alternativa për Gjermaninë (AfD).
Elon Musk, miliarder dhe pronar i Tesla, është bërë një aleat i rëndësishëm i administratës Trump dhe ka vendosur të marrë pjesë aktive në politikën gjermane. Në një nga tubimet e AfD-së, Musk u kërkoi gjermanëve të votonin për partinë dhe tha se Gjermania duhet të “harrojë fajin e së kaluarës”.
Merz kritikoi ndërhyrjet e Musk në politikën gjermane në dhjetor, duke i quajtur ato “invazive dhe pretencioze”, pasi pronari i Tesla-s botoi një artikull në gazetën gjermane Welt am Sonntag në të cilin ai e quajti AfD-në “shkëndijën e fundit të shpresës” për Gjermaninë.
Kush është Merz?
Friedrich Merz ka qenë anëtar i Unionit Demokristian (CDU) që nga viti 1972. Ai shërbeu si deputet i Parlamentit Evropian nga viti 1989 deri në vitin 1994, dhe më pas ishte deputet i Bundestagut nga viti 1994 deri në vitin 2009. Nga viti 2000 deri në vitin 2002, ai ishte kryetar i grupit parlamentar CDU/CSU, gjë që e bëri lider të opozitës në Bundestag.
Pasi u tërhoq nga politika në vitin 2009, Merz iu përkushtua një karriere juridike dhe biznesi, duke përfshirë punën si këshilltar i lartë në firmën ligjore Mayer Brown. Në vitin 2022 ai iu rikthye jetës politike duke marrë drejtimin e CDU-së. Në shtator 2024, ai u emërua kandidati i CDU/CSU për kancelar në zgjedhjet e ardhshme federale të vitit 2025.
Merz është i njohur për pikëpamjet e tij konservatore dhe avokimin e liberalizmit ekonomik. Rikthimi i tij në politikë u shënua nga një përpjekje për ta drejtuar partinë drejt vlerave më tradicionale, veçanërisht në çështjet sociale, dhe drejt politikave ekonomike të orientuara nga tregu.
