Sekretari i parë i Partisë Socialiste të Francës, Olivier Faure, mbështetë Lëvizjen Vetëvendosje dhe Albin Kurtin për kryeministër.
“Për të gjitha këto arritje mund të jeni krenarë dhe po ashtu t’i thoni vetes se sot jeni në rrugën e duhur që nesër Bashkimi Europian t’ju hapë dyert e tij”, ka thënë Faure.
Mesazhi i tij i plotë:
Tash, pas social-demokratëve evropianë, edhe unë ju bëj thirrje të mbështetni këtë të diel Kryeministrin tuaj Albin Kurti dhe Lëvizjen VETËVENDOSJE!
Albin Kurti siguroi stabilitet në vendin tuaj. Me gjithë situatën e ndërlikuar dhe pengesat e shumta diplomatike, politike dhe ekonomike, ai e orientoi vendin drejt standardeve europiane.
Dhe sot arritjet janë të dukshme. Si në rastin e mbështetjes për foshnjat, pastaj rritjes së pensioneve, shkollimit universitar falas, përfshirjes së grave dhe të të rinjve në tregun e punës, deri te ai i mbështetjes për transicion ekologjik.
Për të gjitha këto arritje mund të jeni krenarë dhe po ashtu t’i thoni vetes se sot jeni në rrugën e duhur që nesër Bashkimi Evropian t’ju hapë dyert e tij. Dhe hapi i parë në këtë drejtim duhet të jetë heqja e masave që u vendosën kundër vendit tuaj, por që nuk kanë më asnjë kuptim, siç e miratoi tashmë Parlamenti Evropian.
Për të gjithë këto arsye, për të siguruar stabilitetin e vendit dhe vazhdimësinë e këtij rrugëtimi, të cilin duhet ta bëjmë së bashku me vendin tuaj të madh dhe të bukur, uroj që këtë të diel të votoni Albin Kurtin dhe Lëvizjen VETËVENDOSJE!
