Partia Demokratike e Kosovës, të shtunën ka përmbyllur fushatën elektorale në sheshin “Zahir Pajaziti”, në Prishtinë.
Kandidati për kryeministër nga radhët e PDK-së, Bedri Hamza tha se fushatën po e përmbyllin me zotimin për rritje pagash e pensionesh.
“Kjo fushatë është e orientuar nga ardhmja me bindjen që Kosova mundet më mirë. Ua jap fjalen që do të punoj me nder dhe çdo premtim për rritje pagash dhe pensioneve do ta realizoj ose jap dorëheqje. Ti rrisim pagat 50%, pensionet 70%…”, tha ai.
“Tash është koha që kjo fushatë të kurorëzohet me një betim. Quajeni edhe besëlidhje në mes nesh. Keni kërkuar paga dhe pensione më të mira – dhe keni të drejtë! Keni kërkuar çmime më të lira – dhe keni të drejtë! Keni kërkuar mundësi dhe vende pune më të mira – dhe keni të drejtë! Keni kërkuar shëndetësi më të mirë e më të lirë – dhe keni të drejtë! Keni kërkuar arsim më të mirë – dhe keni të drejtë! Keni kërkuar që fëmijët të mos largohen nga Kosova – dhe sërish keni të drejtë! Keni kërkuar që Kosova me qenë ma mirë – dhe keni të drejtë! Ju kam dëgjuar. Në çdo fshat e qytet, në kopshtet e fëmijëve, shkolla, spitale, dyqane, fabrika. Ju kam dëgjuar kudo. Kam dëgjuar nëna dhe baballarë. Kam dëgjuar vajza dhe djem të rinj. Kam dëgjuar punëtorë dhe të papunë. Kam dëgjuar mësues, infermierë, mjekë, biznesmenë dhe gra. Kam dëgjuar veteranë. I kam dëgjuar të gjithë! Dhe sonte po ju shikoj në sy dhe po ua jap fjalën”, ka thënë Hamza.
Kreu i PDK-së Memli Krasniqi tha se Hamza është gati që të garantojë se asnjë qytetar nuk do të harrohet ose të mbesë prapa.
“Të gjithë pa përjashtim e ndjejmë se Kosova mundet më mirë. Ne kemi plan dhe program konkret, të cilën e përgatitëm me qytetarët tonë. Kemi njeriun më të duhur dhe më të përgatitur për ta zbatuar këtë program të jashtëzakonshëm. Bedriu është familjar i ndershëm, profesionist me integritet dhe lider që e mban fjalën. Ai e ka dëshmuar kompetencën e tij në të kaluarën dhe po e dëshmon edhe sot me arritje të pamohueshme dhe rezultate konkrete. Vula e profesionalizmit të tij është në secilin projekt transformues në dy dekadat e para të lirisë”, ka thënë Krasniqi.
