Rrjeti i organizatave “Demokracia në Veprim” (DnV) ka publikuar rezultatet preliminare të zgjedhjeve të sotme. Sipas të dhënave të para, Lëvizja Vetevendosje kryeson me 40.4% të votave, ndërsa Partia Demokratike e Kosovës renditet e dyta me 21.7%, Lidhja Demokratike e Kosovës ka marrë 17.5% të votave, dhe AAK 7.2%.
Rrjeti i organizatave “Demokracia në Veprim” ka raportuar për një proces të qetë dhe të pjekur të votimit në zgjedhjet parlamentare të 9 shkurtit. Sipas tyre, rreth 500 vëzhgues statikë dhe 50 ekipe mobile kanë monitoruar procesin, ndërsa qytetarët kanë demonstruar një nivel të lartë të pjekurisë qytetare dhe demokratike.
Sipas DnV, dalja në votime ka qenë 42 përqind, pa llogaritur votat me kusht dhe ato të diasporës.
Rezultatet preliminare:
Vetevendosje: 40.4%
PDK: 21.7%
LDK: 17.5%
AAK, NISMA, e të tjerët: 7.2%
Koalicioni për Familjen: 2.4%
Lista Serbe: 5.4%
Partia Za Slobodu Pravdu i Opstanak: 0.6%, e që sipas DnV-së, në bazë të këtyre rezultateve kjo i mjafton që të sigurojë një ulëse në Kuvendin e Kosovës.
DnV thekson se pas numërimit të votave të diasporës dhe atyre me kusht, rezultatet mund të ndryshojnë deri në 5 përqind.
Gjithashtu, DnV kërkon nga partitë politike dhe përkrahësit e tyre që të përmbahen nga festimet e parakohshme dhe të presin rezultatet zyrtare të KQZ-së për të ruajtur atmosferën e qetë gjatë gjithë procesit.
