Rreshteri Major Parlac Ionuț Cosmin (35) ishte anëtar i Batalionit të Mbështetjes së Zjarrit 281 në Focsani. Ministria rumune e Mbrojtjes tha se aksidenti ndodhi në një pishinë.”Ushtari, i cili ishte jashtë detyrës në atë kohë, pësoi lëndime të rënda ndërsa po notonte në një kompleks ujor në Sarajevë. Ambulancat mbërritën në vendngjarje menjëherë pas incidentit,” tha ajo.
Stafi mjekësor i dha ndihmën e parë dhe e transportoi urgjentisht në Qendrën Klinike të Universitetit të Sarajevës. Pavarësisht përpjekjeve të personelit mjekësor, ushtari u konstatua i vdekur menjëherë pas mbërritjes në spital.
Rrethanat e ngjarjes janë duke u hetuar nga Prokuroria Ushtarake në Rumani, ndërsa në shtabin dhe kompaninë e batalionit është formuar një komision i posaçëm.
Rreshteri Parlac Ionuț Cosmin ka shërbyer në Forcat e Armatosura Rumune që nga viti 2019. Ai ishte i martuar dhe baba i dy fëmijëve.
