Koalicioni i OJQ-ve “Demokracia në Veprim” ka publikuar deklaratën preliminare për zgjedhjet parlamentare të 9 shkurtit, duke vlerësuar se zgjedhjet u zhvilluan në përputhje me standardet demokratike, por duke evidentuar disa problematika.
Në konferencën për media, Eugen Cakolli ka paraqitur gjetjet kryesore të vëzhguesve. Ai ka theksuar se “zgjedhjet ishin të lira, konkurruese dhe të drejta, dhe u zhvilluan në përputhje me standardet demokratike,” duke shtuar se procesi i votimit dhe numërimit ka qenë “i qetë dhe demokratik,” pa incidente që mund të cenonin integritetin e zgjedhjeve.
Megjithatë, Cakolli ka theksuar se “procesi i publikimit të rezultateve pati disa vështirësi teknike, që shkaktuan konfuzion dhe ndikuan në besimin e publikut në transparencën e procesit.” Ai ka përmendur gjithashtu se “numërimi i votave për kandidatët nuk ka filluar ende për shkak të problemeve teknike, që mund të shkaktojnë vonesa në certifikimin e rezultateve.”
Në lidhje me fushatën zgjedhore, Cakolli ka theksuar se ajo ishte “dinamike dhe programore,” por ka pasur “një diskurs politik të ashpër,” veçanërisht nga partia në pushtet, çka ka sjellë një “numër rekord të gjobave të shqiptuara nga PZAP.”
Ai gjithashtu ka përmendur votimin jashtë vendit, i cili ka përjetuar “ndërhyrje politike të MPJD-së në pothuajse të gjitha fazat e tij.” Cakolli ka shtuar se, “problemet me transportimin e votave kanë ngritur dyshime lidhur me sigurinë dhe integritetin e këtij procesi.”
Një tjetër shqetësim është çështja e ngjyrës matrikuluese, e cila është kritikuar për “fshirjen e lehtë të saj nga gishti i votuesve.” Cakolli ka theksuar se përdorimi i kësaj ngjyre ka qenë “shkelje e fshehtësisë së votës,” dhe ka nënvizuar se KQZ duhet të “rishikojë disa vendime që kanë cenuar këtë të drejtë themelore.”
Në fund, ai ka përmendur se zgjedhjet u monitoruan nga “më shumë se 20,000 vëzhgues,” dhe ka përmendur vendimin e diskutueshëm të KQZ-së për certifikimin e Listës Serbe, i cili pas ankesës nga PZAP dhe Gjykata Supreme, u rishikua dhe u korrigjua.
