MARTESAT në Kinë ranë me një të pestën vitin e kaluar, pavarësisht përpjekjeve të shumta të qeverisë për të inkurajuar çiftet e reja të martohen dhe të kenë fëmijë për të rritur popullsinë në rënie të vendit.
Më shumë se 6.1 milionë çifte u regjistruan për t’u martuar vitin e kaluar, nga 7.68 milionë një vit më parë, sipas të dhënave nga Ministria e Çështjeve Civile.
Rënia e interesit për martesë dhe krijimin e një familjeje i është atribuar prej kohësh kostove të larta të kujdesit për fëmijët dhe arsimimit në Kinë. Për më tepër, ngadalësimi i rritjes ekonomike në vitet e fundit e ka bërë më të vështirë gjetjen e punës për njerëzit me diplomë universitare dhe ata që kanë punë ndihen të pasigurt për perspektivat e tyre afatgjata.
Por për autoritetet kineze, rritja e interesit për martesën dhe lindjen e fëmijëve është një shqetësim urgjent.
Kina po plaket me shpejtësi
Kina ka popullsinë e dytë më të madhe në botë me 1.4 miliardë banorë, por ajo po plaket me shpejtësi.
Shkalla e lindjeve ka rënë për dekada për shkak të politikës së Kinës për një fëmijë nga viti 1980 deri në 2015 dhe urbanizimit të shpejtë. Në dekadën e ardhshme, rreth 300 milionë kinezë – ekuivalente me pothuajse të gjithë popullsinë e SHBA-së – pritet të dalin në pension.
Masat e marra nga autoritetet vitin e kaluar për të trajtuar problemin përfshinin thirrjen ndaj kolegjeve dhe universiteteve kineze për të theksuar pikëpamjet pozitive për martesën, dashurinë, pjellorinë dhe familjen.
Vitin e kaluar pa një rritje të lehtë të lindjeve pas një qetësie për shkak të pandemisë dhe sepse viti 2024 ishte viti i dragoit sipas zodiakut kinez – dhe fëmijët e lindur atë vit konsideroheshin ambiciozë. Por edhe me rritjen e lindjeve, popullsia e vendit ra për të tretin vit radhazi.
Të dhënat treguan gjithashtu se më shumë se 2.6 milionë çifte aplikuan për divorc vitin e kaluar, 1.1 për qind më shumë nga viti 2023.
