Ish-diplomati dhe gazetari Donat Syla, ka reaguar pas rezultatit të zgjedhjeve, ku Albin Kurti dhe Lëvizja Vetëvendosje siguruan një fitore bindëse.
Syla ka uruar miqtë e tij që votuan për VV-në, por njëkohësisht ka shprehur shqetësimin e tij të thellë për drejtimin që po merr Kosova nën këtë qeverisje. Ai thekson se votuesi kosovar është përcaktuar për një lidership që përdor fyerje ndaj opozitës dhe ushqen ndasi brenda shoqërisë.
“Votuesi kosovar është fiksuar pas ‘Albin Babës’, edhe sikur nesër Donald Trump të deklarojë nga Shtëpia e Bardhë se Kurti nuk e ka mbështetjen e tij,” ka thënë Syla duke nënvizuar izolimin e Kosovës në arenën ndërkombëtare.
Ai shpreh frikën se Kosova po shkon drejt greminës dhe se aleatët ndërkombëtarë tashmë e kanë lëshuar dorën, duke e lënë vendin të rrënohet si projekt shtetëror.
“Republika e Kosovës është ndërtuar me mund dhe sakrificë me ndihmën e aleatëve. Po ecim në drejtim të gabuar dhe kjo do të na kushtojë shumë. Uroj të jem gabim,” përfundon ai. /Kosovatimes/
