Presidenti amerikan Donald Trump mbrojti sot sërish planin e tij të diskutueshëm për zhvendosjen e palestinezëve nga Rripi i Gazës, duke thënë se ata nuk do të lejohen të kthehen në zonë.
Kur u pyet nëse palestinezët do të lejoheshin të ktheheshin në Gaza, Trump tha për Fox News se nuk do ta bënin sepse do të kishin strehim shumë më të mirë. Ai theksoi se qëllimi i tij është të krijojë një vend të përhershëm për palestinezët.
“Ne do të ndërtojmë komunitete të bukura për 1.9 milion njerëz,” tha ai në një intervistë, duke vënë në dukje se ato komunitete duhet të jenë pak më larg nga vendi ku janë tani dhe ku është rreziku. “Ndërkohë, unë do të merrja kontrollin e Gazës. Mendoni si një projekt të pasurive të paluajtshme për të ardhmen,” shtoi ai.
OKB: Ky do të ishte spastrim etnik
Trump tha se pret të arrijë një marrëveshje me Egjiptin dhe Jordaninë për rivendosjen e palestinezëve. Megjithatë, të dyja vendet e kundërshtuan me forcë idenë e pranimit të palestinezëve nga Gaza.
Plani i tij për të marrë kontrollin e Gazës, për të zhvendosur banorët dhe më pas për të rindërtuar territorin ka tërhequr kritika të ashpra nga aleatët dhe kundërshtarët amerikanë, ndërsa kryeministri izraelit Benjamin Netanyahu e ka mbështetur atë.
Ekspertët ligjorë theksojnë se dëbimi i palestinezëve nga Gaza do të ishte shkelje e ligjit ndërkombëtar dhe Kombet e Bashkuara kanë paralajmëruar për spastrim etnik.
