Administrata e presidentit amerikan Donald Trump po ushtron presion ndaj vendeve në Evropë që të rrisin dërgesat e armëve në Ukrainë, në mënyrë që vendi të ketë një “pozicion më të mirë në negociatat e paqes”, shkruan Reuters.
Siç theksojnë ata, kjo lëvizje është edhe një lloj garancie për Ukrainën dhe liderin e saj Volodymyr Zelensky se SHBA nuk do t’i braktisë.
Megjithatë, Trump ka një qasje të ndryshme nga administrata e mëparshme Joe Biden, e cila mori përsipër pjesën më të madhe të armatimit të Ukrainës. Udhëheqësi i ri amerikan dëshiron që Europa ta marrë atë pozicion tani.
Sipas burimeve të Reuters, presioni do të intensifikohet gjatë Konferencës së Sigurisë në Mynih, kur i dërguari i posaçëm i SHBA për Ukrainën dhe Rusinë, Keith Kellogg, së bashku me nënpresidentin JD Vance, do të bisedojnë me përfaqësues të vendeve evropiane.
Sigurisht, nga kjo lëvizje do të përfitojnë edhe SHBA-të, duke pasur parasysh se vendet evropiane do të blejnë armë amerikane, të cilat më pas do t’i dërgojnë në Kiev.
Përveç kësaj, Kellogg dhe Vance duhet t’u paraqesin aleatëve të tyre në Evropë një plan që do të vazhdonte ndihmën amerikane për Ukrainën, por do të reduktohej ndjeshëm financiarisht.
Këto plane, siç shkruan Reuters, janë bërë me synimin që SHBA të tërhiqen nga pozicioni i saj si lider në mbështetjen e Ukrainës, por që ky vend të mos “braktiset”, pra të ndërtojë pozicionin më të mirë të mundshëm përpara fillimit të negociatave për paqen me Rusinë.
