Presidenti i ri sirian Ahmed al-Shara ka thënë se plani i Presidentit të SHBA-së, Donald Trump për të dëbuar palestinezët nga Rripi i Gazës dhe që Shtetet e Bashkuara të marrin nën kontroll territorin është “një krim i rëndë që përfundimisht do të dështojë”. Trump tha se SHBA do të marrë Rripin e Gazës dhe do ta zhvillojë atë ekonomikisht pasi palestinezët të zhvendosen diku tjetër. Sipas tij, palestinezët nuk do të kishin të drejtë të kthehen.
Në një intervistë me podcastin britanik The Rest Is Politics, Al-Shaara argumentoi se propozimi i Trump nuk do të ketë sukses. “Unë besoj se asnjë forcë nuk mund të dëbojë një popull nga toka e tyre. Shumë vende janë përpjekur ta bëjnë këtë dhe asnjë nuk ia ka dalë, veçanërisht gjatë luftës në Gaza gjatë një viti e gjysmë të kaluar,” tha ai.
Al-Shaara, i shpallur president i përkohshëm pasi grupi i tij militant rrëzoi Bashar al-Asad, tha se nuk do të ishte “as moralisht e mençur dhe as politikisht korrekte” që Trump të drejtonte një plan për të dëbuar palestinezët nga toka e tyre.
“Në 80 vitet e këtij konflikti, të gjitha përpjekjet për t’i zhvendosur ata kanë dështuar; ata që u larguan janë penduar. Mësimi palestinez që të gjithë brezat kanë mësuar është se është e rëndësishme të ruhet toka e vet,” shtoi ai. Egjipti, Jordania dhe vende të tjera arabe kanë kundërshtuar me forcë çdo përpjekje për të dëbuar palestinezët përtej kufirit. Ata kanë frikë se kjo do të minonte perspektivat për një “zgjidhje me dy shtete” dhe se kombet arabe do të duhej të përballeshin me pasojat.
