Ka arsye për të besuar se autoritetet ruse po përgatisin akte sabotimi në Detin Baltik nën mbulesën e një “flamuri të huaj”, sipas një raporti nga Instituti Amerikan për Studimin e Luftës (ISW).
Sipas analistëve, Moska aktualisht po punon për krijimin e një sfondi të përshtatshëm në hapësirën mediatike. “Kremlini mund të jetë duke krijuar kushte informacioni për sulme të mundshme me flamur të rremë në Detin Baltik, si dhe kundër politikanëve të opozitës ruse që jetojnë jashtë vendit, me qëllim të diskreditimit të Ukrainës”, thuhet në raport.
Ekspertët kujtuan mesazhin e publikuar nga Shërbimi i Inteligjencës së Jashtme Ruse (SVR) të martën, më 11 shkurt, në të cilin Drejtoria kryesore e Inteligjencës Ushtarake të Ukrainës (GUR) akuzohej se po përgatitej të hidhte në erë një anije të huaj në Detin Baltik. Inteligjenca ruse pretendoi se Ukraina po vepronte “me ndihmën e kuratorëve perëndimorë” dhe do të përdorte minat ruse për të fajësuar më pas Moskën për incidentin. “Shërbimet e inteligjencës ukrainase dhe perëndimore presin që një operacion i tillë do të detyrojë NATO-n të bllokojë hyrjen e Rusisë në Detin Baltik,” siguroi SVR, duke shtuar se kjo mund të provokojë një konflikt të drejtpërdrejtë ushtarak midis Rusisë dhe NATO-s.
SVR gjithashtu raportoi se inteligjenca ukrainase po planifikon të kryejë atentate ndaj përfaqësuesve të opozitës jo-sistematike ruse dhe sipërmarrësve që fshihen jashtë nga ndjekja penale.
ISW vuri në dukje se SVR ka akuzuar më parë Ukrainën dhe vendet e tjera perëndimore për planifikimin e sulmeve me flamuj të rremë për të diskredituar Ukrainën dhe “të futë një pykë” në unitetin perëndimor për të ndihmuar Ukrainën, veçanërisht në momente të vështira në debatin mbi mbështetjen për vendin dhe një traktat të mundshëm paqeje me Rusinë.
Ndërkaq, komandanti i përgjithshëm i marinës gjermane, zëvendësadmirali Jan Christian Kaak, deklaroi se luftanijet e vendit i janë nënshtruar sabotimeve në shumë raste që nga fillimi i luftës në Ukrainë. Ai vuri në dukje se “më shumë se një anije” u dëmtua. Ka pasur edhe raste të infiltrimit të bazave detare nga toka dhe deti. “Për mendimin tonë, ne jemi duke u testuar. Ata po përpiqen të minojnë besimin e shoqërisë sonë – si në nivel kombëtar ashtu edhe brenda aleancës ( NATO – TMT). “Dhe ato krijojnë bazën për veprimet e mëvonshme aktive ushtarake,” tha Kaak, duke shtuar se kërcënimi nga Rusia vazhdon të rritet. Më parë, dhjetëra kilogramë rroje metalike u gjetën në motorin e korvetës së re të marinës gjermane Emden në Hamburg, pak para nisjes së parë të anijes. Nëse anija do të kishte dalë në det, do të ishte dëmtuar rëndë, thanë ekspertët . Gazetarët pretendojnë se korveta mund të ishte shënjestër e sabotimit, por Rusia ende nuk është përmendur në këtë rast.
Gjatë tre muajve të fundit, një sërë incidentesh janë regjistruar në Detin Baltik, duke rezultuar në dëmtimin e infrastrukturës nënujore që siguron komunikim ose furnizim me energji midis vendeve të NATO-s. Shërbimet speciale ruse dyshohen për sabotim.
