Vendimi i SHBA për të ndërprerë ndihmën e huaj po ka një ndikim serioz në shëndetin global, duke goditur programet për të luftuar poliomielitin, HIV dhe sëmundje të tjera, deklaroi sot kreu i Organizatës Botërore të Shëndetësisë (OBSH), Tedros Adhanom Ghebreyesus. Ai i bëri thirrje Uashingtonit që të rishqyrtojë vendimin e tij derisa të gjendet një zgjidhje.
“Ne jemi të shqetësuar për disa veprime të qeverisë amerikane që po ndikojnë seriozisht në shëndetin global,” tha Tedros në një konferencë virtuale për shtyp në Gjenevë. Presidenti Donald Trump ngriu pagesat e ndihmës së huaj menjëherë pasi mori detyrën në janar, derisa u krye një rishikim i programit.
Tedros tha se pezullimi i Planit të Reagimit Presidencial për Ndihmën ndaj SIDA-s (PERFAR) ka ndaluar trajtimin, testimin dhe parandalimin e HIV në 50 vende. “Klinikat janë mbyllur dhe punonjësit e shëndetësisë janë dërguar në shtëpi”, tha ai, duke shtuar se OBSH po përpiqej të ndihmonte këto vende të kapërcejnë mungesën e barnave antiretrovirale.
Tedros: Ne i bëjmë thirrje SHBA-së që të vazhdojë financimin
Përpjekjet për të çrrënjosur poliomielitin dhe reagimi ndaj lisë së majmunëve janë goditur gjithashtu, dhe në Mianmar 60,000 njerëz kanë mbetur pa shërbime për shpëtimin e jetës. “Ne i bëjmë thirrje SHBA-së që të shqyrtojë vazhdimin e financimit, të paktën derisa të gjenden disa zgjidhje”, tha Tedros.
Përveç ngrirjes së ndihmës, Trump gjithashtu lëvizi për të tërhequr SHBA nga OBSH në ditën e parë të presidencës së tij, gjë që minon gjithashtu bashkëpunimin, veçanërisht në luftimin e epidemive dhe gripit, tha Tedros.
Maria Van Kerkhove, drejtore e përkohshme për pandemitë dhe epidemitë, tha se OBSH nuk kishte marrë raporte për grip nga Qendrat e SHBA për Kontrollin dhe Parandalimin e Sëmundjeve që rreth 24 janarit. “Ne vazhdojmë të kontaktojmë me homologët tanë dhe agjencitë qeveritare amerikane. Nuk kemi marrë përgjigje prej tyre, por do të vazhdojmë të kontaktojmë dhe përsëri shpresojmë që ky shkëmbim të vazhdojë”, tha ajo.
