Komisioni Qendror i Zgjedhjeve për herë të parë ka përmendur mundësinë që të kalohet në “planin B” për numërimin e votave të kandidatëve për deputetë, por që do të përfshinte edhe numërimin e votave të subjekteve politike.
“Plani B”, sipas KQZ-së do të nënkuptonte që evidentimi i rezultateve të bëhet sikur në të kaluarën në formularë të rezultateve për subjekte politike dhe formularë të rezultateve të kandidatëve, dhe jo siç ka filluar tani të bëhet duke u krijuar formularët digjital.
Për të kaluar në Planin B, anëtarët e KQZ-së kanë kërkuar që të shohin se si po rrjedhë numërimi i cili ka filluar në 18 Qendrat Komunale të Numërimit dhe në 8 të tjera që planifikohet të fillojë pasditen e së enjtes.
Gjithashtu, anëtarët e KQZ-së kanë kërkuar që sa më shpejtë që është e mundur të bëhet publikimi i rezultateve të kandidatëve për deputetë nga vendvotimet që deri më tani janë numëruar në Qendrat Komunale të Numërimit.
Drejtuesi i Sekretariatit të KQZ-së ka treguar arsyet se pse deri tash nuk ka arritur të nisë numërimi edhe në 8 komuna të tjera.
Buzhala tha se janë kryesisht problemet me shërbimet profesionale të IT, për t’i funksionalizuar pajisjet që shërbejnë në Qendrën Komunale të Numërimit. Si shembull ai ka marrë lidhjen e kamerave me laptopi me televizor, e te këto, siç sqaroi ai, po bëhet punë e madhe që të arrihet gjatë ditës së sotme të përmbushet aspekti i funksionalizimit e të njëjtat të fillojnë nesër numërimin e kutive të votimit për kandidatë.
