Prokuroria Themelore në Gjilan ka njoftuar se ka ndaluar një person për shkak të dyshimit se ka kryer veprën penale ‘’Punimet e paautorizuara dhe përvetësimet e monumenteve kulturore”.
Në njoftim thuhet se në lokalin e të dyshuarit janë sekuestruar mbi 200 artefakte arkeologjike, prej të cilave 80 monedha të periudhës së sundimit romak, bizantin dhe mesjetar.
“Ndërsa, sot më datën 13 shkurt 2025, thuhet se me kërkesë të Prokurorisë Themelore në Gjilan, nga policia është realizuar urdhër kontroll në lokalin e tij në Gjilan, ku janë gjetur dhe sekuestruar mbi 200 artefakte arkeologjike, prej të cilave 80 monedha janë prej periudhës së sundimit romak, bizantin dhe mesjetar”, thuhet në njoftim.
Me urdhër të prokurorit të shtetit është ndaluar i pandehuri D.H., në kohëzgjatje prej 48 orëve, pasi dyshohet se ka kryer aktivitete hulumtuese të paautorizuara në vende arkeologjike me pajisje detektuese.
Tutje thuhet se i njëjti dyshohet për veprën e sipërshënuar penale pasi me veprimet e tij ka kryer gërmime apo hulumtime arkeologjike pa autorizimin e organit kompetent.
