Ministrja në detyrë e Punëve të Jashtme dhe Diasporës, Donika Gërvalla, ka takuar Përfaqësuesin e ri të Bashkimit Evropian për Dialogun, Peter Sorensen, gjatë vizitës së saj në Munih. Po ashtu, Gërvalla u takua me Sekretarin e Shtetit për Çështjet Evropiane dhe Ndërkombëtare të Bavarisë, Eric Beiswenger.
Gërvalla dhe Sorensen kanë diskutuar për zhvillimet e fundit në Kosovë dhe rajon, si dhe për pritshmëritë lidhur me procesin e dialogut të ndërmjetësuar nga BE-ja.
Ajo ka theksuar se Kosova mbetet e përkushtuar ndaj një dialogu konstruktiv dhe parimor, që duhet të reflektojë realitetin politik në rajon.
“Bashkëpunimi i ngushtë me aleatët tanë mbetet thelbësor për të siguruar një qasje të drejtë dhe të qëndrueshme, që forcon stabilitetin dhe sigurinë në rajon”, ka shkruar Gërvalla në rrjetet sociale.
Gjatë Konferencës së Sigurisë në Munih, Donika Gërvalla ka takuar edhe Eric Beisenger, Sekretar i Shtetit për Çështjet Evropiane dhe Ndërkombëtare të Bavarisë.
Ata kanë diskutuar për forcimin e bashkëpunimit ekonomik mes Kosovës dhe Bavarisë.
“Theksova rritjen e jashtëzakonshme ekonomike të Kosovës dhe mundësitë për rritjen e investimeve gjermane në Kosovë, si dhe për shkëmbime në teknologji, inovacion dhe arsim profesional”, ka shkruar ministrja në detyrë. /Kosovatimes/
