Policia e Kosovës ka bërë thirrje për ndihmën e qytetarëve në identifikimin dhe kapjen e Veton Hoxhës, i dyshuar për veprën penale “Vrasje e rëndë e mbetur në tentativë”.
Siç thuhet në njoftim, Hoxha, i lindur më 06.08.1992 në Prizren dhe banues në këtë qytet, është i kërkuar pas një përleshjeje që ndodhi më 29 janar 2025, në rrugën “Transiti i Ri” në Prizren, ku u shkrepën armë zjarri dhe dy persona pësuan lëndime. Policia ka sekuestruar tre pistoleta gjatë hetimeve dhe ka arrestuar të gjithë të përfshirët, përveç Hoxhës.
“Si pasojë, dy persona kanë pësuar lëndime, ndërsa tre armë zjarri (pistoleta) janë sekuestruar. Lidhur me këtë rast, të gjithë të përfshirët janë identifikuar dhe arrestuar, përveç të dyshuarit të lartpërmendur”, thuhet në njoftimin e policisë.
Prokuroria Themelore në Prizren ka autorizuar publikimin e fotografisë së të dyshuarit përmes mediave dhe rrjeteve sociale. Policia apelon për bashkëpunim dhe kërkon çdo informacion që mund të çojë në arrestimin e tij.
“Kërkojmë bashkëpunimin e qytetarëve për të ofruar informata që do të ndihmonin në identifikimin dhe arrestimin e tij. Nëse keni ndonjë informacion për vendndodhjen e të dyshuarit, ju lutemi të kontaktoni Policinë e Kosovës në numrin 192 ose të paraqiteni në stacionin më të afërt policor”, thuhet tutje në njoftim. /Kosovatimes/
