Në shkollën “Pavarësia” në kryeqytet, e cila nisi punën një vit pas shpalljes së pavarësisë së Kosovës, u zhvilluan aktivitete në prag të festës së 17 shkurtit.
Në prag të 17-vjetorit të pavarësisë së Kosovës, shkolla “Pavarësia” në Prishtinë, e cila nisi punën një vit pas shpalljes së pavarësisë së Kosovës, me këngë e valle festoi 16-vjetorin e saj. Në këtë atmosferë festive, drejtoresha komunale e Arsimit në Prishtinë, Jehona Lushaku, theksoi rëndësinë e kësaj dite.
“Në vigjilje të 17 shkurtit, ne kujtojmë momentet historike që kanë shënuar formimin e shtetit tonë – një histori e mbushur me emra të mëdhenj, me heronj dhe me kontributin e shumë mësimdhënësve e nxënësve. Shkolla juaj është një simbol i kësaj historie, pasi lindi bashkë me Pavarësinë”, tha Lushaku.
Një tjetër moment historik që na mbush me ndjenja atdhedashurie është vetë përvjetori i kësaj shkolle, i cili lidhet ngushtë me shpalljen e pavarësisë së Kosovës, deklaroi drejtori i kësaj shkolle, Halil Brahaj.
“Shkolla ‘Pavarësia’ filloi punën një vit pas Pavarësisë së Kosovës, me rreth 750 nxënës, 36 paralele dhe 50 mësimdhënës. Sot, 16 vite më vonë, ajo numëron mbi 1900 nxënës, 61 paralele dhe një staf prej 100 punonjësish”, tha Brahaj.
Në këtë përvjetor të rëndësishëm, nuk munguan as përfaqësues nga Shqipëria, të cilët theksuan lidhjen e fortë mes shkollave shqiptare.
“Përvjetori i shkollës tuaj është edhe më i bukur, sepse përkon me një ngjarje madhështore – Pavarësinë e Kosovës. Ky është një moment që na kujton se jemi një komb, që punojmë e luftojmë së bashku për të arritur suksese. Binjakëzimi mes shkollave tona nuk është thjesht një bashkëpunim, por një urë që lidh mendjet dhe zemrat tona. Ne ndajmë eksperienca për të treguar brezave që transmetojmë dije, kulturë dhe dashuri”, theksoi Anila Tabaku, drejtoreshë e Shkollës “Misto Mame” në Tiranë.
Me këtë rast, u ndanë mirënjohje për ish-drejtorët, mësimdhënësit e pensionuar, mësimdhënësit aktualë si dhe për nxënësit e dalluar të kësaj shkolle.
