Manchetser City ka lënë pas humbjen nga Real Madrid në Champions League dhe ka treguar forcën e tij kundër Newcastle United në “Etihad Stadium”. Në ndeshjen e zhvilluar të shtunën në kuadër të xhiros së njëzet e pestë në Premier League ka marrë fitore me rezultat 4-0.
Vendasit e kanë nisur ndeshjen më mirë dhe e kanë gjetur avantazhin në minutën e nëntëmbëdhjetë, kur një top i gjatë nga Ederson e ka nxjerrë Omar Marmoush përballë portierit Martin Dubravka. Sulmuesi egjiptian është treguar i saktë, duke shënuar golin e tij të parë për City.
Ekipi i Pep Guardiola ka dyfishuar shifrat vetëm pesë minuta më vonë. Ilkay Gundogan ka krijuar hapësirën e duhur dhe Marmoush ka finalizuar me një goditje të saktë nga jashtë zone.
Newcastle, që kishte një ecuri mbresëlënëse prej gjashtë fitoreve radhazi në transfertë, ka tentuar të reagojë, por City ka vazhduar me dominimin. Në minutat e fundit të pjesës së parë, Savinho ka asistuar për Marmoush, i cili me një goditje të fortë brenda zonës e ka kompletuar tregolëshin.
Në fraksionin e dytë, City e ka kontrolluar ritmin, ndërsa Dubravka ka bërë disa pritje ndaj tentativave të Savinho dhe Erling Haaland. Nga ana tjetër, Newcastle ka kërkuar ta shënonte golin e nderit, por Ederson ka reaguar mirë ndaj një gjuajtje të rrezikshme nga Lewis Miley.
Megjithatë, vendasit nuk janë ndalur dhe në minutën e tetëdhjetë e katërt, James McAtee e ka vulosur rezultatin me një gjuajtje të saktë pas një asisti me kokë nga Haaland.
Në tabelën e kryesuar nga Liverpool, City gjendet në vendin e katërt e Newcastle në vendin e shtatë.
