Bayer Leverkusen dhe Bayern Munich kanë ndarë pikët në një barazim pa gola, në një sfidë ku vendasit kanë dominuar pjesën më të madhe të ndeshjes, ndërsa kampioni në fuqi ka pasur vështirësi për të krijuar raste.
Leverkusen e ka nisur ndeshjen më mirë, duke u treguar skuadër më kërkuese.
Nathan Tella e ka bërë një gjuajtje pas një goditje dënimi të ekzekutuar me zgjuarsi, por Kim Min-jae e ka bllokuar në kohë. Florian Wirtz është përpjekur ta befasonte Manuel Neuer me një goditje të improvizuar, por portieri i Bayern ka reaguar mirë, ndërsa Jeremie Frimpong nuk ka pasur fat, pasi ka tentuar me kokë dhe topi është ndalur nga traversa. Tella ka pasur një tjetër mundësi të artë, kur harkimi i saktë i Piero Hincapie e ka vënë në pozicion ideal, por ai është bërë lojtari i dytë i Leverkusen brenda pak minutash që godet traversën.
Bayern e ka mbyllur pjesën e parë pa regjistruar asnjë gjuajtje në kuadrat, për herë të parë që nga sezoni 1992/93, kur kanë nisur të mbahen këto statistika. Sulmuesi kryesor i bavarezëve, Harry Kane, ka tentuar me kokë pak para pushimit, por gjuajtja e tij ka përfunduar jashtë dhe ai ndodhej gjithashtu në pozicion jashtë loje.
Pjesa e dytë ka vijuar me dominimin e Leverkusen, me Bayern që ka vazhduar të vuajë në ndërtimin e aksioneve. Një dalje e pasigurt e Neuer pas një goditjeje dënimi nga Alex Grimaldo ka çuar në një goditje këndi për vendasit. Nga ky rast, Tella e ka provuar një goditje akrobatike, por topi ka shkuar jashtë. Leverkusen ka vazhduar të krijojë rrezik me goditjet standarde, dhe në një tjetër rast të tillë, Hiroki Ito e ka larguar topin nga vija e portës pasi paraprakisht ka provuar Tella.
Bayern është përpjekur që të reagojë, dhe në minutën e shtatëdhjetë e tretë Harry Kane e ka regjistruar goditjen e parë në kuadrat për skuadrën e tij, por ajo është bllokuar.
Në krahun tjetër, Leverkusen i është afruar sërish golit, me një tjetër tentativë të Tella, që është ndalur nga mbrojtja e Bayern.
Në minutat e fundit, të dy ekipet kanë pasur mundësi për ta fituar takimin. Wirtz dhe Leon Goretzka kanë goditur jashtë kuadratit në të dyja anët e fushës, ndërsa Neuer ka bërë një pritje vendimtare ndaj një goditje të rrezikshme të Amine Adli nga afërsia. Në sekondat e fundit, Wirtz kishte një tjetër mundësi për Leverkusen, por e ka dërguar topin jashtë, duke konfirmuar rezultatin përfundimtar 0-0.
Pas këtij barazimi, Bayern vazhdon të kryesojë Bundesliga me tetë pikë avantazh ndaj Leverkusen, teksa kanë mbetur edhe dymbëdhjetë ndeshje deri në fund të kampionatit.
