Ish-presidenti serb Boris Tadiq ka njoftuar në rrjetin social “X” se bashkëbiseduesit e tij në Konferencën e Sigurisë në Mynih e kanë informuar se përfaqësuesit e delegacionit serb “po i shtyjnë informacione politikanëve perëndimorë se pas protestave të studentëve në Serbi qëndrojnë shërbimet dhe interesat ruse”.
“Ky nuk është vetëm një nivel i ri i sulmeve ndaj studentëve, por edhe krejtësisht në kundërshtim me propagandën që po bëhet në Serbi se po bëhet një revolucion me ngjyra, duke qenë se revolucionet me ngjyra zakonisht nisen nga Perëndimi”, ka thënë Tadiq në rrjetin social X.
Tadiq deklaroi nga Mynihu se është absurde që qeveria të pretendojë në të njëjtën kohë se po ndodh një revolucion me ngjyra dhe se Rusia qëndron pas protestave.
Sipas tij, kjo është veçanërisht absurde duke pasur parasysh se qeveria progresive nënshkroi një marrëveshje për statusin e vëzhguesit të Serbisë në aleancën ruse të mbrojtjes CSTO dhe formoi një grup pune me Rusinë për të luftuar pikërisht kundër revolucioneve me ngjyra.
Delegacioni serb në Konferencën e Sigurisë në Mynih udhëhiqet nga ministri i Jashtëm serb Marko Gjuriq.
