Shkruan: Radomir DIMIÇ
Tri herë deri tani, si qytetar i lirë dhe shtetas i Kosovës, kam shkuar për të votuar në zgjedhjet parlamentare të Republikës së pavarur dhe sovrane të Kosovës. Një herë kam shkuar vetëm dhe dy herë me vajzën time, në një shtet ku respektohet dinjiteti njerëzor, liria e votës dhe sovraniteti i çdo votuesi.
Herën e parë, në zgjedhjet e vitit 2010, u përpoqa të garoja me nismën time qytetare KRAHU I POPULLIT, por përjetova vjedhje zgjedhore. Më saktësisht, u pengova nga kryetari i Partisë Liberale, Slobodan Petrović, që të ulem me nder në Kuvendin e Kosovës. Nuk vlejti as fakti që kreu i atëhershëm i LDK-së e pranoi se isha i vjedhur, pasi partitë e tjera fituese injoruan këtë akt të paligjshëm dhe piraterik, pavarësisht se fletëvotimet e mia u gjetën të shpërndara në disa vende pranë Prishtinës.
Dhe tani, më 9 shkurt 2025, për herë të tretë, në shoqërinë e vajzës sime, kemi ardhur me nder për të përmbushur qetësisht detyrën tonë zgjedhore, para së gjithash patriotike, qytetare dhe morale. Këtë e bëmë me krenari, sepse nuk iu nënshtruam presioneve brutale dhe propagandës së paprecedentë serbe, sipas së cilës duhet të votohej vetëm për Listën Serbe (SL), sepse ajo qenka e vetmja garanci për mbijetesën e serbëve në Kosovë. Sigurisht, nuk na shkoi ndërmend të shiteshim për 170 eurot e Vuçiqit, as të udhëtonim falas me autobusët e tyre “fluturues”, të cilët ende nuk janë blerë për EXPO-n më të shtrenjtë në botë të Vuçiqit, që nëse studentët nuk e rrëzojnë, pritet të mbahet në Beograd. Ishte me të vërtetë një ndjenjë e bukur të ishe votues në Kosovë më 9 shkurt, në një vend ku nuk sundon diktatura dhe nuk ka një qeveri kriminale e të korruptuar si në Serbi, e cila shpesh përshkruhet si Koreja e Veriut e Evropës. Aty ku zgjedhjet e ndershme dhe të lira janë të ndaluara që kur në pushtet është autokrati më i madh i Evropës dhe gënjeshtari më i madh serb, Minhauzeni serb – Aleksandar Vuçiq. Ajo që më ka fascinuar më shumë është se zgjedhjet në Kosovë treguan një kulturë të lartë të sovranitetit të çdo qytetari dhe pluralizmit të votës, si dhe përkushtimin ndaj parimeve demokratike. U binda me sytë e mi se si funksionon sundimi i ligjit. Ishte një nder i madh për mua të jem pjesë e këtij procesi të qetë dhe dinamik zgjedhor, ku morën pjesë të gjitha komunitetet pakicë. Po, pati retorikë të ashpër gjatë fushatës zgjedhore, por jo presione si ato në Veriun e Kosovës, ku Lista Serbe (SL) ushtronte shantazh ndaj disa votuesve, veçanërisht punonjësve në shëndetësi dhe arsim, si dhe kategorive sociale që marrin ndihmë financiare nga Serbia. Kështu që edhe një herë u binda se Serbia vazhdon të kontrollojë serbët e Kosovës. Dhe në fund, për rezultatet e zgjedhjeve, për të cilat ende nuk ka rënë plotësisht perdja.
Lëvizja Vetëvendosje, siç edhe pritej, ka fituar bindshëm shumicën e votave, por jo aq sa për të formuar e vetme qeverinë e re. Natyrisht, ende priten votat nga diaspora dhe votat me kusht. Kryeministri aktual mund të formojë një qeveri pakice me ndihmën e komuniteteve pakicë dhe ndonjë individi që kalon në krahun e tij, por të njëjtën gjë mund ta bëjnë edhe partitë opozitare. Megjithëse konfigurimi i ardhshëm i Kuvendit ende nuk është i qartë, mundësitë që të ndodhë “Kurti 3” janë mjaft reale, pavarësisht disa vlerësimeve se ai nuk ka potencial për formimin e koalicionit. Nuk duhet harruar se ai ka qeverisur më gjatë se çdo kryeministër tjetër i Kosovës dhe se populli i ka dhënë sërish më së shumti besim. Ai është një politikan shumë me shumë përvojë për ta lëshuar lehtë fitoren nga duart, dhe kurrë nuk dihet se nga cili mëngë do të nxjerrë kartën fituese.
