Hoti i dërgon letër Kaja Kallas, kërkon hapjen e arkivave të Serbisë

Kryetari i Komisionit Qeveritar për Personat e Zhdukur, Andin Hoti, i ka dërguar një letër drejtuar Përfaqësueses së Lartë për Punët e Jashtme të BE-së, Kaja Kallas, duke kërkuar hapa konkretë për të detyruar Serbinë të hapë arkivat shtetërore dhe të bashkëpunojë në zbardhjen e fatit të 1,591 qytetarëve të zhdukur gjatë luftës së vitit 1998-1999.

Në 17-vjetorin e Pavarësisë së Kosovës, kryetari i Komisionit Qeveritar për Personat e Zhdukur, Andin Hoti, theksoi rëndësinë e shpalosjes së së vërtetës për fatin e 1,591 qytetarëve të Kosovës që ende mbeten të zhdukur.

Ai njoftoi se Qeveria e Kosovës ka dërguar një letër drejtuar Përfaqësueses së Lartë për Punët e Jashtme dhe Politikën e Sigurisë të BE-së, Kaja Kallas, ku kërkohet hapja e arkivave shtetërore të Serbisë, përfshirë ato ushtarake, policore dhe të inteligjencës, të cilat përmbajnë informacione kyçe mbi vendndodhjen e të zhdukurve.

Hoti ka thënë se pavarësisht se u miratua Deklarata për Personat e Zhdukur më 2 maj të vitit 2023, Serbia vazhdon t’i bllokojë përmbushjet e detyrimeve të saja dhe po i shkel obligimet që i ka sipas të drejtës ndërkombëtare. Hoti në letër ka shkruar se Bashkimi Evropian ka rol kyç për të siguruar që përpjekjet të mos dështojnë.

– Hapjen e menjëhershme dhe të pakushtëzuar të arkivave shtetërore të Serbisë, të cilat përmbajnë informacione kyçe mbi vendndodhjen e të zhdukurve.

– Bashkëpunim të plotë për zbardhjen e rolit të forcave paramilitare dhe bashkëpunëtorëve serbë, të cilët, me mbështetjen e regjimit të Millosheviqit, ekzekutuan dhe zhdukën mijëra shqiptarë.

– Llogaridhënie për refuzimin e vazhdueshëm të Serbisë për të dorëzuar informacion mbi varrezat masive të njohura brenda territorit të saj.

“Familjet e të zhdukurve kanë pritur për një kohë tepër të gjatë për të vërtetën dhe drejtësinë që e meritojnë. Besoj se nën udhëheqjen tuaj, mund të sigurojmë që zëri i tyre të dëgjohet dhe që Serbia të detyrohet t’i përmbushë detyrimet e saja morale dhe ligjore”, ka shkruar mes tjerash Anidn Hoti.