Imami i parë mysliman që pranoi publikisht se është homoseksual është qëlluar për vdekje teksa ishte ulur në një makinë në Afrikën e Jugut.
Muhsin Hendricks u zu në pritë nga dy burra teksa vizitonte qytetin jugor të Gqeberha të shtunën. Policia tha se personat e përfshirë në vrasje kishin fytyrat e tyre të mbuluara. Pamjet e kamerave të vëzhgimit tregojnë një nga sulmuesit duke u hedhur nga automjeti, duke vrapuar drejt makinës në të cilën ishte Hendricks dhe duke qëlluar disa herë me armë nga dritarja anësore.
Hendricks ishte në makinë me shoferin, i cili mbijetoi. Policia nuk ka përcaktuar një motiv për vrasjen, por partitë politike dhe organizatat LGBTQ+ thonë se Hendricks ishte në shënjestër sepse ai hapi një xhami në Cape Town për myslimanët homoseksualë dhe bëri thirrje që anëtarët e komunitetit LGBTQ+ të mirëpriteshin në Islam.
Ishte subjekt i një filmi dokumentar
Homoseksualiteti është i ndaluar në fenë islame. Departamenti i Drejtësisë i Afrikës së Jugut konfirmoi se po hetonte pretendimet se Hendricks ishte objektivi i një atentati. Hendricks ishte i njohur ndërkombëtarisht dhe foli në konferencën Ndërkombëtare të Lezbikeve, Gay, Biseksualeve, Trans dhe Intersekseve në Afrikën e Jugut vitin e kaluar.
Aleanca Demokratike, partia e dytë më e madhe politike e Afrikës së Jugut, theksoi se “natyra e vrasjes sugjeron fuqimisht vrasje profesionale,” raportoi Associated Press .
Hendricks ishte subjekt i një filmi dokumentar të publikuar në vitin 2022 të quajtur Radical. Në film, ai pranoi se kishte qenë objektiv i kërcënimeve të shumta. “Kjo thjesht nuk më shqetëson. Nevoja për të qenë autentik është më e madhe se frika nga vdekja,” tha ai me atë rast.
Ai kishte një grua.
Filmi u fokusua gjithashtu tek të rinjtë myslimanë homoseksualë të cilët thanë se Hendricks u siguroi atyre një vend ku ata mund të luteshin dhe të praktikonin Islamin duke qenë ende ata që ishin.
Këshilli Gjyqësor Mysliman i Afrikës së Jugut tha se ndërsa ka pohuar vazhdimisht se pozicioni i Hendricks është i papajtueshëm me mësimet islame, ai “dënon pa mëdyshje vrasjen e tij dhe çdo akt dhune të drejtuar ndaj anëtarëve të komunitetit LGBTQ ose ndonjë komuniteti tjetër”.
Hendricks u rrit në një familje myslimane konservatore dhe u martua me një grua. Ai i dha fund martesës së tij dhe doli publikisht si imam homoseksual në mesin e viteve 1990, duke krijuar një rrjet mbështetës dhe më vonë një xhami për myslimanët homoseksualë.
