Që prej 17 shkurtit 2008 me rastin e shpalljes së Pavarësisë së Kosovës, monumenti i NEWBORN-it ka ndërruar dizajnin sipas tematikës apo ngjarjeve të rëndësishme të zhvillimit në fusha të ndryshme.
Në këtë përvjetor NEWBORN synon ta bashkojë organiken dhe digjitalen duke reflektuar ndikimin e Inteligjencës Artificiale. Ajo sot është në qendër të vëmendjes së qytetarëve të shumtë që po vijnë ta vizitojnë.
“Urime edhe për juve 17 vjetori i lindjes së Pavarësisë. Shumë i mirë. Sikur çdo herë qysh ndryshohet edhe kësaj radhe ja paskan qëlluar. Urime për gjithë shqiptarët”, tha Afërdita Mjeku, qytetare.
“NEWBORN-i sivjet bukur duket shumë. Më pëlqen si i kanë bë kështu ngjyrat. Atmosfera e mirë, pak ftohtë, por festive normal”, tha Shefki Azizi, qytetar.
Të lumtur ishin edhe fëmijët që për të festuar bënin edhe foto te monumenti i NEWBORN-it.
NEWBORN u bë simboli i pavarësisë së Kosovës tash e 17 vjet dhe pamja i ndërrohet çdo vit.
