Më shumë se tre muaj janë bërë prej kur aktorët e Teatrit Kombëtar të Kosovës kanë hyrë në grevë. Kjo për shkak të mos rritjes së koeficientit dhe siç kanë thënë, mungesës së përmbushjes së kërkesave të tyre.
Komuniteti artistik i Teatrit Kombëtar të Kosovës ka hyrë tashmë në muajin e katërt të grevës. Shpejtim Kastrati, aktor mbi 20 vjet në teatër, tha se ky komunitet ende nuk kanë marrë asnjë përgjigje për kërkesat e tyre për rritje të pagave.
“Me Ligjin e Pagave jemi degraduar, nuk jemi vlerësuar siç duhet. Ne e kemi dërguar edhe një rregullore siç është kërkuar nga Ligji i Pagave, e njëjta nuk është trajtuar kurrë. Ka dy vite e më shumë se nuk është duke u ngritë asnjë koeficient”, tha Kastrati.
Ai shtoi se për shkak të grevës, janë detyruar që asnjë shfaqje të mos e japin për publikun. Kjo, thekson ai, nuk kishte ndodhur asnjëherë as pas kalimit në amfiteatrin e Pallatit të Rinisë për shkak të shkuarjes në rinovim të objektit të Teatrit Kombëtar të Kosovës.
“Gati tri vite kur është mbyllë objekti atje jemi ankuar për kushte. Por, asnjëherë nuk është anuluar asnjë shfaqje për asnjë arsye. Dy herë ka ndodhur, në një rast si pasojë e ujërave të zeza për çka edhe ka nisë rinovimi i teatrit. Ne nuk kemi hyrë në greva për shkak të kushteve sepse Teatri është në rinovim dhe kjo na ka bërë që të pajtohemi ta vazhdojmë punën…”, shtoi ai.
RTK ka pyetur edhe në Ministrinë e Kulturës për grevën e aktorëve, por deri më tani nuk ka marrë përgjigje. Ndryshe, ministri i Kulturës, Rinisë dhe Sportit, Hajrulla Çeku, kishte deklaruar se vazhdimisht e kanë mbështetur sektorin e kulturës dhe teatrit.
