“Kërcënimet hibride ndaj procesit të zgjerimit dhe kundërpërgjigja potenciale ndaj tyre”, ka qenë tema e diskutimit mbi të cilën u mblodhën në Poloni ministra për çështje evropiane nga rajoni dhe Evropa në një takim informal ministerial të organizuar nga Presidenca e Polonisë e Këshillit të BE-së, pjesë e së cilit takim ishte edhe numri dy i Qeverisë së Kosovës, Besnik Bislimi.
Ai në këtë takim theksoi sulmet hibride me të cilat edhe Kosova është përballur dhe arsyet pse vendi është target i sulmeve të huaja e ndërhyrjeve nga jashtë.
Gjithashtu në këtë takim zëvendësi i Kurtit foli edhe sulmet në faqen e internetit të KQZ-së në zgjedhjet e fundit në Kosovë.
“Ai foli edhe mbi sulmet e vazhdueshme ndaj shtetit tonë dhe sigurisë kombëtare, i fundit ai në infrastrukturë kritike, në kanalin e Ibër-Lepencit nëntorin e vitit të kaluar. Më tej, zëvendëskryeministri përmendi dhe sulmet në faqen e internetit të KQZ-së në zgjedhjet e fundit në vendin tonë, por edhe shpërndarjet e dezinformatave dhe lajmeve të rreme, veçanërisht përgjatë fushatës së zhvilluar, një rast prej tyre lajmi i rremë mbi rritjen e çmimit të energjisë për 35% vetëm pak ditë para mbajtjes së zgjedhjeve”, ka bërë të ditur zyra e zëvendëskryeministrit Bislimi, përmes një njoftimi për media.
Tutje thanë se, ai shprehu nevojën për sa më shumë unitet në Evropë dhe qasje të përbashkët në përballjen me sfidat që vijnë nga kërcënimet e sulmet hibride.
Në fillim të takimit, thuhet se, Ministri për Bashkimin Evropian të Polonisë, Adam Szłapka, shprehu se procesi i zgjerimi të BE-së është prioritet edhe për presidencën aktuale të Polonisë dhe është e rëndësishme ndarja e eksperiencave dhe përballjen e përbashkët në ballafaqimin me kërcënimet hibride, gjersa komisionerja Marta Kos theksoi investimet dhe përkrahjen e BE-së në këtë drejtim dhe mbështetjen ndaj procesit të zgjerimit përkundër këtij kërcënimi.
