Shoqëria civile kërkon monitorin e procesit të rekrutimit për kategoritë e larta.
Grupi për Studime Juridike dhe Politike, ka dorëzuar padi për Ministrinë e Financave, Punës dhe Transfereve lidhur me konkursin për Sekretar të Përgjithshëm. Përmes një konference për medie, shoqëria civile ka kërkuar nga gjykata që t’i obligojnë institucionet që në procedura të rekrutimit për pozita të kategorisë së lartë drejtuese, të kenë mundësi të marrin pjesë si vëzhgues.
Qeveria e vendit në mbledhjen e saj të mbajtur në fund të muajit të kaluar emëroi Arton Ahmetin, sekretar të përgjithshëm në Ministrinë e Financave, Punës dhe Trasfereve. Në fjalën e tij ministri i Finacave, Hekuran Murati pati thënë se zgjedhja e sekretarit të ri erdhi pas një procesi të gjatë e me shumë ankesa.
“Megjithatë të gjitha këto janë trajtuar, janë shqyrtuar dhe janë shperrur të gjitha ankesat dhe tashmë kemi një mundësi që të lëvizim tutje me emërimin e kandidatit, Arton Ahmeti në pozitën e sekretarit në MFPT”, ka thënë Murati.
Mirëpo padi ndaj Ministrisë së Financave ka ngritur Grupi për Studime Juridike dhe Politike, pasi konkursin po e konsiderojnë jo transparent.
“Bazuar në dispozitat e Ligjit për Zyrtarët Publik që i japin të drejte shoqërisë civile që të monitorojnë proceset rekrutuese të kësaj natyre, Iniciativa CorrWatch kishte parashtruar kërkesë për monitorim më 13 gusht e 9 shtator 2024. Këto kërkesa ishin injoruar nga Ministria e cila më 11 shtator 2024, kishte publikuar listën e kandidatëve që e kanë kaluar fazën e verifikimit paraprak. Pavarësisht kësaj, përfaqësuesit e Iniciativës CorrWatch edhe më 13 shtator 2024, kishin dërguar kërkesë për qasje në dosjen e kandidatëve dhe për monitorimin e fazave të tjera, e cila kërkesë po ashtu nuk u mor parasysh asnjëherë”.
Liridon Salihi nga Qendra për Raste Gjyqësore Strategjike, tha se shoqëria civile ka të drejtë të monitorojë proceset e rekrutimit për kategoritë e larta drejtuese.
“Me vendimin e datës 23 janar 2025, Këshilli ka ardhur në përfundim që nuk është kompetent për të vendosur për këtë ankesë, por i njëjti ka konfirmuar të drejtën e shoqërisë civile, për të monitoruar proceset e rekrutimit për kategoritë e larta drejtuese dhe obligimin e institucioneve publike që t’iu mundësojnë shoqërisë civile monitorimin e këtyre proceseve”, ka thënë Salihi.
Qendra për Raste Gjyqësore Strategjike tha se shoqërisë civile i ishte mohuar nga Ministria e Financave një e drejte e garantuar me Ligjin për Zyrtarët Publik, monitorimi i konkursit të lartpërmendur.
