Presidenti francez Emmanuel Macron thirri dje një takim urgjent të liderëve evropianë në Paris për të koordinuar qëndrimin e tyre mbi bisedimet e paqes për Ukrainën.
Delegacionet amerikane dhe ruse takohen sot në Riad.
Presidenti francez Emmanuel Macron tha se ai foli me Donald Trump dhe Volodymyr Zelensky për t’i informuar ata mbi mbledhjen e djeshme të liderëve evropianë në Paris.
Udhëheqësit e Mbretërisë së Bashkuar dhe Bashkimit Evropian u takuan dje për një samit urgjent për Ukrainën. Nuk dihet saktësisht se cila ishte tema e diskutimit, por raportet sugjerojnë se vendet ishin të ndara nëse Evropa do të dërgonte forca paqeruajtëse në Ukrainë në rast të marrëveshjes së armëpushimit.
Macron shkroi në rrjetin social X të hënën vonë se marrëveshja e paqes “duhet të shoqërohet me garanci të forta dhe të besueshme të sigurisë për ukrainasit”.
“Ne do të punojmë për këtë së bashku me të gjithë evropianët, amerikanët dhe ukrainasit”, tha Macron. “Ky është çelësi.”
Shtëpia e Bardhë e përshkroi bisedën me Macron si miqësore, ndërsa Zelensky tha se ata ranë dakord që garancitë e sigurisë për Ukrainën duhet të jenë “të forta dhe të besueshme”.
