Në adresë të presidentes së Kosovës, Vjosa Osmani, ka arritur një tjetër urim në 17 vjetorin e shtetësisë, këtë herë nga homologia e saj sllovene, Natasha Pirc Musar.
Në urimin e saj, presidentja sllovene ka ritheksuar mbështetjen e shtetit që drejton, për reformat dhe angazhimet ndërkombëtare të Kosovës, si dhe për integrimin e saj në strukturat euroatlantike.
“Në mesazhin e saj, presidentja Pirc Musar ka shprehur urimet më të përzemërta për presidenten Osmani dhe qytetarët e Kosovës, duke theksuar përkushtimin e vazhdueshëm të Sllovenisë për ta mbështetur Kosovën në rrugëtimin e saj për përparim dhe zhvillim të gjithanshëm. Ajo ka ritheksuar mbështetjen e Sllovenisë për reformat dhe angazhimet ndërkombëtare të Kosovës, si dhe për integrimin e saj në strukturat euroatlantike”, thuhet në njoftimin presidencial.
Bëhet e ditur se, presidentja Pirc Musar ka nënvizuar rëndësinë e stabilitetit në Ballkanin Perëndimor për zhvillimin e të gjithë rajonit dhe ka shprehur gatishmërinë për të thelluar bashkëpunimin mes dy vendeve në kuadër të Procesit Brdo-Brijuni dhe nismave të tjera ndërkombëtare.
