Ambasadori britanik në Kosovë, Jonathan Hargreaves, është njoftuar në detaje nga kreu i KQZ-së, Kreshnik Radoniqi, për aktivitetet që po i zhvillon ky institucion qysh nga e diela e 9 shkurtit kur Kosova iu nënshtrua procesit zgjedhor.
Sipas njoftimit nga KQZ-ja, Radoniqi e informoi ambasadorin britanik se në Qendrat Komunale të Numërimit është duke bërë numërimin e votave të kandidatëve për deputetë dhe se në pjesën më të madhe të komunave ky proces ka përfunduar.
“Gjithashtu, Radoniqi e informoi ambasadorin britanik edhe për proceset tjera që po kryhen nga KQZ-ja, siç është vlerësimi i pakove me fletëvotime nga votimi jashtë Kosovës, respektivisht votimi përmes postës”, thuhet tutje në njoftim.
Nga ana e tij, ambasadori Hargreaves përgëzoi KQZ-në për procesin e suksesshëm dhe të qetë të 9 shkurtit si dhe vlerësoi përpjekjet e KQZ-së që procesi në vazhdim të realizohet sa më shpejt dhe me transparencë.
