Prokuroria Themelore në Prishtinë ka reaguar ndaj deklarimeve të gazetarit Lirim Mehmetaj, duke i demantuar pretendimet e tij se prokuroria ka konfirmuar ndonjë lajm lidhur me vendosjen e pajisjeve GPS në veturën e gazetarit V.K.
Në reagimin e saj, prokuroria thekson se “deklarimet e tilla nuk janë në interes të askujt, e aq më pak të drejtësisë” dhe se për çdo komunikim apo lajm, opinioni publik do të njoftohet vetëm “përmes kanaleve zyrtare.”
Tutje, Prokuroria Themelore në Prishtinë thekson se “prokurori i shtetit do të vazhdojë në luftimin e veprave penale dhe kryerësve të tyre” dhe se “deklarimet e tilla mund të dëmtojnë integritetin e hetimeve dhe nuk i shërbejnë zbardhjes dhe hetimit të veprave penale.”
Ndryshe, gazetari Lirim Mehmetaj në një postim në Facebook ka thënë se Prokuroria e Kosovës ka konfirmuar se pajisja përgjuese GPS që gazetari Vehbi Kajtazi e gjeti në veturën e tij në fund të tetorit të vitit të kaluar, është në pronësi të Agjencisë së Kosovës për Inteligjencë (AKI). Ai ka theksuar se kjo është konfirmuar nga Prokuroria e Kosovës.
“Se kjo pajisje i takon AKI-së tashmë e ka konfirmuar edhe Prokuroria e Kosovës. Pas një kërkese për të dhëna nga Dogana e Kosovës është konfirmuar se aparati që iu gjet Kajtazit në veturë është një nga 74 pajisjet e njëjta që kishin ardhur në Kosovë si material i porositur për AKI-në”, ka shkruar Mehmetaj.
