Njerëzit po ikin nga shtëpitë e tyre pasi një gropë u hap në një rrugë të madhe në Surrey, raporton Guardian . Autoritetet kanë ndërprerë furnizimin me ujë të fshatit Godstone pasi një gropë me diametër 20 metra gëlltiti një kopsht.
Banorët e Surrey janë evakuuar nga frika e një shpërthimi pasi një gropë e madhe u shfaq në një rrugë kryesore. Ata duhej të linin shtëpitë e tyre pasi një gropë e madhe u hap në rrugën kryesore në Godstone dhe vazhdon të zgjerohet.
Gropa u shfaq pardje dhe dje pasdite ishte rritur në të paktën 20 metra, duke çuar në ndërprerjen e furnizimit me ujë dhe shembjen e një kopshti. Këshilli i Qarkut Surrey ka shpallur gjendjen e jashtëzakonshme dhe banorët vendas janë këshilluar të shmangin zonën gjatë kryerjes së riparimeve. Policia evakuoi disa ndërtesa dhe ngriti një kordon sigurie në një rreze prej 100 metrash.
Banorëve u është thënë që të largohen nga shtëpitë e tyre sa më shpejt të jetë e mundur.
Banorëve të William Way në Godstone iu tha herët në mëngjes dje që të largoheshin nga shtëpitë e tyre sa më shpejt të ishte e mundur nga frika se kabllot e ekspozuara mund të shkaktonin një shpërthim. Banorët i cilësuan skenat e evakuimit si të frikshme dhe njëri prej tyre, i cili u zhvendos më pak se një javë më parë, tha se u detyrua të flinte në makinën e tij për shkak të situatës.
“Nuk e di se çfarë do të ndodhë më pas, askush nuk mund të më japë asnjë informacion. Ata thanë se mund të kalojë një javë para se të kthehemi. Nuk besoj se e dinë se në çfarë gjendje janë instalimet e gazit dhe ato elektrike, kështu që ka rrezik shpërthimi, zjarri, shembje…
Jeta ime është ende në kuti, nuk e kam zbërthyer as pasi kam lëvizur. “Nuk është pikërisht ajo që dëshironi të përjetoni të hënën në mbrëmje”, tha Josh Neame për BBC.
“Tani duhet të kuptojmë se ku do të jetojmë”
Rez Mira dhe familja e tij kanë dalë nga shtëpia në orët e para të mëngjesit të djeshëm dhe kanë fjetur me të afërmit në Croydon. Kur janë kthyer kanë mbetur të tronditur nga skena. Oborri i shtëpisë së tyre u gëlltit nga një gropë. “Ne jemi të tmerruar. Tani duhet të kuptojmë se ku të jetojmë. Shkolla fillon javën tjetër dhe ne duhet të gjejmë diçka afër,” tha ai.
Policia konfirmoi se disa ndërtesa ishin evakuuar si masë paraprake dhe se punimet në rrugë ka gjasa të zgjasin pak. Nicola dhe Damian Styles thanë se u zgjuan rreth orës 1:30 të mëngjesit të djeshëm nga policia që trokiti në derën e tyre dhe u tha se duhej të largoheshin nga shtëpia për shkak të rrezikut të një shpërthimi gazi.
“Aktualisht po rrezikojmë dhe presim që situata të zhvillohet”
Çifti u kthye në shtëpi rreth mesditës për të marrë disa sende, por më vonë vendosi të qëndronte në shtëpinë e tyre. Kur u pyetën nëse mendojnë se do të duhet të largohen sërish, Styles u përgjigj se nuk e dinë, por aktualisht po rrezikojnë dhe presin që situata të zhvillohet.
SES Water njoftoi se inxhinierët e tyre po punojnë për të riparuar një rrjet të këputur të ujit të shkaktuar nga një gropë dhe po dërgojnë ujë në shishe për banorët. Një zëdhënës i Surrey Highways këshilloi njerëzit të shmangin zonën.
