Grupi palestinez Hamas, i cilësuar si një grup terrorist nga SHBA dhe BE, i dorëzoi Kryqit të Kuq të enjten në mëngjes trupat e katër pengjeve të marra gjatë një sulmi ndaj Izraelit më 7 tetor 2023 dhe të vrarë në Rripin e Gazës.
Midis tyre janë trupat e dy fëmijëve: Ariel Bibas, i cili ishte katër vjeç në kohën e kapjes, dhe vëllai i tij Kfir, i cili ishte nëntë muajsh. U dorëzua edhe trupi i nënës së tyre, Shiri, dhe një tjetër pengu i rritur, Oded Lifshitz.
Katër arkivole të zeza që përmbanin trupat iu dorëzuan përfaqësuesve të Kryqit të Kuq. Makinat u nisën nga Rripi i Gazës për në Izrael.
Babai i fëmijëve të vdekur, Yarden Bibas, u lirua më parë në kuadër të fazës së parë të marrëveshjes së armëpushimit. Ai u mbajt i ndarë nga gruaja dhe fëmijët.
Fati i familjes Bibas është kthyer në një nga simbolet e brutalitetit të sulmit të Hamasit më 7 tetor 2023 për shoqërinë izraelite. Kryeministri izraelit Benjamin Netanyahu e quajti sot një ditë shumë të vështirë për vendin.
Hamasi pretendoi në nëntor 2023 se fëmijët dhe nëna e tyre u vranë në një sulm ajror izraelit në Rripin e Gazës. Gjatë dorëzimit të trupave, përfaqësuesit e grupit akuzuan gjithashtu Izraelin se shkaktoi vdekjen e pengjeve. Autoritetet izraelite nuk e konfirmuan zyrtarisht vdekjen e tyre deri ditën e fundit. Nuk ka asnjë informacion të pavarur për rrethanat e vdekjes së tyre. Yarden Bibas dhe të afërmit e tij thanë se do të kërkonin një hetim.
Trupat e pengjeve u dorëzuan si pjesë e marrëveshjeve të lidhura më parë për një armëpushim të përkohshëm. Gjashtë pengjet e mbijetuar pritet të lirohen të shtunën në këmbim të qindra të burgosurve palestinezë. Në këtë mënyrë do të përmbushen marrëveshjet e fazës së parë të armëpushimit. Rreth 60 persona do të mbeten peng në Gaza, prej të cilëve, sipas të dhënave të disponueshme, vetëm rreth gjysma janë gjallë. Negociatat për fazën e dytë të marrëveshjes janë duke vazhduar.
