Gjatë javës që po lëmë pas ambasadori britanik Jonathan Hargreaves ka zhvilluar takime me liderët e partive politike.
Ai ka takuar kryeministrin në detyrë Albin Kurtin e Lëvizjes Vetëvendosje (LVV), Memli Krasniqin e Partisë Demokratike të Kosovës (PDK), Lumir Abdixhikun e Lidhjes Demokratike të Kosovës (LDK), dhe Ramush Haradinaj e Aleancës për Ardhmërinë e Kosovës (AAK).
Ambasadori Hargreaves ka theksuar rëndësinë e formimit të një qeverie që do të punojë për interesat e popullit të Kosovës dhe do të përmirësojë çështjet kyçe që lidhen me integrimin e vendit në Bashkimin Evropian dhe NATO.
“Këtë javë kam zhvilluar takime të ndara me liderët e partive politike: kryeministrin Albin Kurti të Vetëvendosjes, Memli Krasniqin e PDK-së, Lumir Abdixhikun e LDK-së dhe Ramush Haradinaj të AAK-së. Shpresoj që së shpejti të formohet një qeveri që do të punojë në interes të popullit të Kosovës dhe do të bëjë përparim në çështjet jetike për rrugën e Kosovës drejt integrimeve euroatlantike.
E ritheksova mbështetjen e Britanisë së Madhe për sigurinë dhe pavarësinë e Kosovës dhe besimin tonë në institucionet e saj demokratike”, ka shkruar Hargreaves në Facebook. /Kosovatimes/
