Këshilli Prokurorial i Kosovës (KPK) dhe Zyra e Kryeprokurorit të Shtetit (ZKPSH) kanë dënuar ashpër sulmin fizik ndaj prokurorit të Departamentit të Përgjithshëm në Prokurorinë Themelore në Pejë, Ramiz Buzhala. Ky sulm lidhet drejtpërdrejt me detyrën e tij zyrtare, duke ngritur shqetësime për sigurinë e prokurorëve në vend.
Në një reagim të përbashkët, KPK dhe ZKPSH theksuan se aktet e tilla janë të patolerueshme dhe se mbështesin fuqishëm prokurorin Buzhala në misionin e tij ligjor. Ata theksuan se ky sulm nuk do ta pengojë prokurorin në ndjekjen e kryerësve të veprave penale duke nënvizuar se Kushtetuta dhe ligjet e Republikës së Kosovës e obligojnë atë të vazhdojë punën pa frikë apo presion.
Ndërkohë, institucionet prokuroriale konfirmuan se rasti është duke u trajtuar me prioritet nga organet e drejtësisë. Sulmuesi është ndaluar për 48 orë dhe janë duke u ndërmarrë të gjitha hapat ligjorë për ndriçimin e plotë të rastit. /Kosovatimes/
