LDK në Pejë ka reaguar ashpër ndaj një incidenti të ndodhur sot pasdite në palestrën “Karagaç”, ku po zhvillohet numërimi i votave. Sipas deklaratës së LDK-së, komisionarja e Vetëvendosjes, Dorentina Shala, ka sulmuar verbalisht në mënyrë të papranueshme një komisionar të LDK-së, pasi ky i fundit nuk kishte lejuar veprime të parregullta gjatë numërimit.
Sipas LDK-së, ky provokim është i përsëritur dhe tregon frustrimin e Vetëvendosjes pas humbjes së mbi 5000 votave në Pejë. Megjithatë, partia thekson se nuk do të lejojë keqpërdorime gjatë procesit të numërimit dhe kërkon që të gjithë komisionarët të vazhdojnë punën e tyre me përgjegjësi dhe korrektësi.
“LDK në Pejë fton të gjithë komisionarët që të kontribuojnë për ruajtjen e qetësisë, në mënyrë që procesi zgjedhor të përfundojë në mënyrë demokratike, ashtu siç i ka hije Pejës dhe Kosovës,” thuhet në reagimin e tyre. /Kosovatimes/
