Presidentja e vendit, Vjosa Osmani, gjatë javës ka zhvilluar takime të ndara me ambasadorë të akredituar në Kosovë. E para e shtetit ka takuar të Ngarkuarën me Punë të Ambasadës së Shteteve të Bashkuara të Amerikës në Kosovë, ambasadorin gjerman dhe atë britanik.
Me secilin veç e veç ka diskutuar për zhvillimet në vend, sigurinë, procesin zgjedhor e konstituimin e institucioneve pas certifikimit të rezultateve nga KQZ-ja.
“Presidentja e Republikës së Kosovës, Vjosa Osmani, gjatë kësaj jave, zhvilloi takime të ndara me përfaqësues të vendeve partnere, duke përfshirë të Ngarkuarën me Punë të Ambasadës së Shteteve të Bashkuara të Amerikës në Kosovë, znj. Anu Prattipati, Ambasadorin e Republikës Federale të Gjermanisë në Kosovë, Jörn Rohde, si dhe ambasadorin e Mbretërisë së Bashkuar në Kosovë, z. Jonathan Hargreaves”, njofton presidenca.
Gjatë këtyre takimeve, siç bëhet e ditur u diskutua për zhvillimet e fundit në vend, përfshirë çështjet e sigurisë, fuqizimin e bashkëpunimit bilateral me shtetet respektive, ecurinë e procesit zgjedhor si dhe konstituimin e institucioneve pas certifikimit përfundimtar të rezultateve nga zgjedhjet parlamentare të 9 shkurtit. /Kosovatimes/
