Policia e Kosovës, përmes Drejtorisë së Hetimit të Krimeve Kibernetike, në koordinim me Prokurorinë e Shtetit dhe njësi të tjera relevante, ka zhvilluar kontrolle në tre lokacione të ndryshme në Prishtinë duke arrestuar tre persona të dyshuar për keqpërdorim të kartelave bankare.
Të arrestuarit, dy shtetas turq dhe një nga Maqedonia e Veriut, dyshohen se, me qëllim përfitimi të kundërligjshëm, kanë përdorur kartela bankare të shtetasve të huaj në POS terminale të bankave vendore. Për këtë veprim, ata ngarkohen me veprën penale “Lëshimi i çeqeve pa mbulesë ose të rremë dhe keqpërdorimi i kartelave të bankës apo të kreditit”.
Gjatë operacionit, policia ka sekuestruar si prova materiale: POS terminale, kartela bankare, një kartelë bankare të modifikuar, para të gatshme, SIM kartela, vula me mbishkrime të bizneseve, kompjuterë, telefona mobilë dhe dokumente të tjera relevante.
Me vendim të prokurorit kompetent, tre të dyshuarit janë ndaluar për 48 orë, ndërsa hetimet po vazhdojnë për zbardhjen e plotë të rastit. /Kosovatimes/
