‘Shkodra Elektronike’, ka realizuar videoklipin e këngës ‘Zjerm’ me të cilën do përfaqësojnë Shqipërinë në Eurovizion më 13 maj në Bazel. Por Beatriçja dhe Kola ende nuk kanë dhënë detaje mbi datën e lëshimit të videoklipit të këngës së tyre e cila fitoi zemrat e publikut dhe votat e jurisë në Fest 63.
Dyshja e këngëtarëve kanë ndarë me publikun disa detaje mbi vendet të cilat do të njohin nga afër këngën ‘Zjerm’ para performimit në Eurovizion.
‘Shkodra Elektronike’ ka bërë me dije se më 3 mars do të performojnë në Berlin, më pas në Selanik më 14 mars, duke vijuar me Marseille të Francës më 20 mars, më tej në Oslo më 22 mars, duke vijuar me Amsterdamin më 5 prill, me Manchesterin më 12 prill, më pas me Londrën më 13 prill dhe duke e mbyllur me Madridin më 19 prill.
‘Shkodra Elektronike’ do të përfaqësojë Shqipërinë në Eurosong të martën e 13 majit. Shqipëria do të performojë në natën e parë gjysmëfinale të Eurovision 2025 që do të zhvillohet në Bazel të Zvicrës.
