Presidenti i SHBA-së, Donald Trump, ka thënë se beson se Rusia “i mban kartat” në çdo bisedim paqeje për t’i dhënë fund luftës në Ukrainë, sepse ajo “ka marrë shumë territor”.
“Unë mendoj se rusët duan të shohin fundin e luftës, unë me të vërtetë po. Mendoj se ata i kanë kartat sepse kanë marrë shumë territor. Ata i kanë kartat,” i tha Trump BBC-së ndërsa kthehej në Uashington pasi foli në një takim investimi në Florida, i cili u mbështet nga Arabia Saudite.
Trump tha gjithashtu se ai beson se Moska dëshiron të shohë një fund të luftës që filloi gati tre vjet më parë me një pushtim në shkallë të plotë të Ukrainës.
Trump e quan sërish Zelenskin “diktator”
Trump e quajti presidentin ukrainas Volodymyr Zelensky një “diktator” për herë të dytë brenda një dite gjatë një fjalimi në Florida. “Ai po refuzon zgjedhjet. Ai është i ulët në sondazhet e Ukrainës. Si mund të jesh i lartë ndërsa çdo qytet po shembet?” tha Trump.
Zelensky e quajti deklaratën e tij “dezinformim”, duke e akuzuar atë se jeton “në një hapësirë dezinformimi që vjen nga Moska”. Mandati i tij pesëvjeçar do të përfundonte në maj të këtij viti, por zgjedhjet u pezulluan për shkak të gjendjes së luftës që ka qenë në fuqi që nga shkurti i vitit 2022.
Trump pretendoi se Zelensky ka vetëm 4% mbështetje në Ukrainë, por BBC raporton se një sondazh i kryer këtë muaj tregoi se 57% e ukrainasve i besojnë presidentit të tyre.
Deklaratat e Trump kanë tërhequr kritika nga liderët evropianë, me kancelarin gjerman Olaf Scholz duke thënë se është “thjesht e gabuar dhe e rrezikshme t’i mohosh Presidentit Zelensky legjitimitetin e tij demokratik”.
Udhëheqësit evropianë paralajmërojnë se asnjë marrëveshje nuk duhet të arrihet pa pjesëmarrjen dhe pëlqimin e ukrainasve dhe kërkojnë gjithashtu që BE të ketë vendin e saj në tryezë në negociatat e paqes. Në këtë kontekst, Trump po kërkon nga Evropa që të jetë garantuese e armëpushimit në Ukrainë duke dërguar trupat e saj në Ukrainë.
Britania e Madhe dhe Franca nuk e kanë refuzuar propozimin, por në të gjithë kontinentin ka rezerva ndaj një ideje të tillë. “Ne nuk mund të dërgojmë trupa pa arritur një paqe të drejtë,” tha Ministrja e Jashtme gjermane Annalena Baerbock.
Trump drejtuar ukrainasve: Ju nuk duhet ta kishit nisur luftën
Ndërkohë, zyrtarët amerikanë dhe rusë zhvilluan bisedimet e tyre të para ballë për ballë të nivelit të lartë që nga fillimi i luftës, por Ukraina dhe udhëheqësit evropianë nuk u ftuan.
Trump më vonë përshkallëzoi më tej retorikën e tij, duke fajësuar Ukrainën për luftën. Ai hodhi poshtë shqetësimet e Ukrainës se ata ishin përjashtuar nga takimi, duke shtuar se ata duhet të kishin nisur bisedimet shumë më herët.
“Sot dëgjova “oh, ne nuk ishim të ftuar”.
