Për herë të dytë një kompani e taksive në Prishtinë është zënë duke e vjedhur energjinë elektrike. E njëjta, sipas KEDS-it ishte kapur edhe në tetor të vitit të kaluar duke e bërë veprimin e njëjtë, për çka ishte detyruar t’ia kthente kompanisë 40 mijë euro. Kësaj radhe detyrimisht duhet t’ia rikthejnë KEDS-it mbi 25 mijë euro.
“Në tetor të vitit të kaluar patëm raportuar për një kompani të taksive nga Prishtina, pronari i së cilës ishte zënë nga KEDS-i duke vjedhur energjinë elektrike. Shërbimin për klientë e kishte me para, ama veturat elektrike po i mbushte pa para. E për këtë i ishte dashur t’ia rikthejë kompanisë 40 mijë euro”, tha KEDS-i.
E tash sipas tyre, e njëjta kompani është zënë sërish duke i mbushur ato vetura ilegalisht, pra duke ia vjedhur rrymën KEDS-it.
“Llogaritja e humbjeve të shkaktuara ndaj kompanisë është bërë prej tetorit të vitit të kaluar, për çka, sipas kalkulimeve, detyrimisht i duhet t’ia rikthejë KEDS-it edhe 25 mijë e 120 euro e 15 cent”, kanë njoftuar ata. /Kosovatimes/
