Me medaljen, Kalorës i Urdhrit Kombëtar të Meritës është nderuar, ish prokurorja e Prokurorisë Speciale Drita Hajdari nga Ambasada e Francës së Kosovë. Ky urdhër i ndarë për ish-prokurorën sipas tyre, është vlerësim për guximin, integritetin dhe vendosmërinë e saj për të luftuar krimin e organizuar, korrupsionin dhe shkeljet e të drejtave të njeriut.
“Kjo mirënjohje nga Franca shpërblen veprimtarinë e shquar të znj. Hajdari të realizuar falë angazhimit të saj profesional. Ish-prokurorja e Prokurorisë Speciale të Kosovës, znj. Hajdari është shquar me guximin, integritetin dhe vendosmërinë e saj për të luftuar krimin e organizuar, korrupsionin dhe shkeljet e të drejtave të njeriut. Guximi dhe profesionalizmi është dëshmuar në veçanti në shumë lëndë të ndjeshme, duke e bërë atë një figurë të respektuar në Kosovë dhe më gjerë. Puna e saj në Prokurorinë Speciale të Kosovës kontribuoi dukshëm në forcimin e institucioneve të drejtësisë dhe konsolidimin e demokracisë në vend”, thotë Ambasada e Francës në Kosovë.
Për ish- prokuroren e pensionuar dy vjet më parë, francezët në Kosovë thonë se la pas një trashëgimi të jashtëzakonshme në fushën e drejtësisë.
“Ndikimi i saj vazhdon të frymëzojë gjeneratat e tashme dhe të ardhshme të gjyqtarëve, prokurorëve dhe juristëve të përkushtuar për mbrojtjen e vlerave demokratike, të cilat i ndajnë Franca dhe Kosova”, thuhet më tej në shkrimin e shpërndarë nga kjo ambasadë bashkë me fotografitë nga kjo ceremoni e cila u mbajt në Rezidencën e Francës në Prishtinë. /Kosovatimes/
