Komuna e Prishtinës, përmes Drejtorisë së Shërbimeve Publike dhe Transportit, ka reaguar pas incidentit të ndodhur në linjën e autobusit 3A, ku sjellja e shoferit ndaj nxënësve është cilësuar e papranueshme.
Pas marrjes së informacionit dhe analizimit të videos së incidentit, komuna ka ndërmarrë masa të menjëhershme: shoferi i përfshirë është larguar nga puna dhe konduktori është pezulluar për 10 ditë, deri në verifikimin e plotë të rastit.
Komuna ka theksuar se dënon çdo veprim që rrezikon sigurinë e fëmijëve dhe qytetarëve dhe ka përsëritur përkushtimin e saj për të garantuar një transport publik të sigurt dhe të përgjegjshëm.
Po ashtu, qytetarët janë ftuar të raportojnë raste të ngjashme duke kontribuar në përmirësimin e shërbimeve të transportit publik. /Kosovatimes/
