Sot mbushen nëntë vjet nga ndarja nga jeta e veprimtarit të çështjes kombëtare, Latif Përvetica. Vdekja e tij la pas dhimbje jo vetëm te familja, por edhe te bashkëveprimtarët dhe shokët e tij që, për dekada, ushtruan veprimtari patriotike dhe çlirimtare në diasporë.
Latif Përvetica nuk qëndroi indiferent ndaj fatit të popullit shqiptar në ish-Jugosllavi. Ai, së bashku me veprimtarë të tjerë si Isa dhe Sinan Elshani, Jahir Preka, Shukri Sinani dhe bashkatdhetarë të tjerë, u angazhua në Dyseldorf, duke përkrahur çështjen kombëtare.
Përmes aktiviteteve të tyre, Klubi Shqiptar në Dyseldorf u bë qendra e parë që mbështeti demonstratat e pranverës së vitit 1981 në Kosovë dhe organizoi protesta në Perëndim. Përvetica mbeti aktiv në lëvizjen kombëtare deri në çlirimin e Kosovës më 1999. Për shkak të angazhimit të tij në diasporë, ai nuk u kthye në vendlindje për gati dy dekada.
Latif Përvetica dha gjithashtu kontribut të rëndësishëm në Fondin 3% dhe atë “Vendlindja Thërret”, i cili mbështeti Ushtrinë Çlirimtare të Kosovës. Sot, në këtë përvjetor, ai kujtohet me respekt si një figurë e përkushtuar për lirinë dhe të ardhmen e Kosovës. /Kosovatimes/
