Një nga agjencitë më të mëdha dhe më të njohura të lajmeve në botë, “The Associated Press”, ka paditur tre zyrtarë të administratës Trump në gjykatën federale për ndalimin e gazetarëve të AP-së nga disa ngjarje të Presidentit Trump, të Zyrës Ovale dhe tw “Air Force One”.
AP-ja pretendon se ky ndalim shkel Amendamentin e Parë, si dhe klauzolën e procesit të duhur në Amendamentin e Pestë, shkruan CNN.
Padia u paraqit të premten pasdite në Gjykatën e Distriktit të SHBA-së në Washington. AP-ja po kërkon një seancë urgjente dhe një urdhër gjyqësor për të shpallur ndalimin si antikushtetues dhe për të kërkuar heqjen e tij.
Më herët gjatë këtij muaji, AP-ja, një nga mediat më të mëdha të botës, u kritikua nga Shtëpia e Bardhë për vazhdimin e përdorimit të frazës “Gjiri i Meksikës”, edhe pse Trump e ndryshoi emrin e këtij trupi uji në “Gjirin e Amerikës.”
Në dokumentin e saj ligjor, AP përmbledh çështjen kështu: Shtëpia e Bardhë u ka urdhëruar gazetarëve të saj “të përdorin fjalë të caktuara në mbulimin e ngjarjeve ose përndryshe do të përballen me një ndalim të paafishuar të aksesit.”
“Shtypi dhe çdo person në Shtetet e Bashkuara kanë të drejtën të zgjedhin fjalët e tyre dhe të mos ndëshkohen nga qeveria,” shkruajnë avokatët e AP-së në ankimin e organizatës. “Kushtetuta nuk lejon që qeveria të kontrollojë fjalimin. Lejimi i një kontrolli dhe hakmarrje të tillë nga qeveria është një kërcënim për lirinë e çdo amerikani.”
Ndalimi u zbatua për herë të parë më 11 shkurt. Redaktorët kryesorë të AP-së menjëherë e përshkruan atë si një shkelje të Amendamentit të Parë, por përpiqen ta zgjidhin mosmarrëveshjen prapa dyerve të mbyllura përpara se të drejtoheshin në veprim ligjor.
Të premten, AP-ja njoftoi se po padit për të mbrojtur mediat e tjera nga ndëshkime të ngjashme nga Shtëpia e Bardhë e Trump.
