Policia e Kosovës ka arrestuar një person të dyshuar për kryerjen e veprave penale “Lëndim i lehtë trupor” dhe “Asgjësim apo dëmtim i pasurisë” në Mitrovicën Veriore.
Siç raporton policia, ngjarja ka ndodhur më datën 22 shkurt 2025, rreth orës 02:15, kur një shofer taksie është sulmuar nga një pasagjer i panjohur, i cili refuzoi të paguajë për shërbimin dhe e goditi shoferin me grusht në fytyrë. Pas incidentit, ai është larguar nga vendi i ngjarjes.
Shoferi ka marrë trajtim mjekësor për lëndimet e marra. Pas hetimeve të zhvilluara nga Sektori i Hetimeve të Stacionit Policor në Mitrovicën Veri, është identifikuar dhe arrestuar i dyshuari, N.M. (28 vjeç), i cili është liruar më vonë pas intervistimit dhe vendimit të prokurorit.
“Arrestimi është kryer mbi bazë të dyshimeve të arsyeshme dhe provave të siguruara që e lidhin të dyshuarin me rastin e raportuar”.
“Policia e Kosovës mbetet e përkushtuar që të ofroj shërbim ndaj qytetarëve në gjithë territorin e vendit, pa dallim” theksohet në njoftimin e policisë. /Kosovatimes/
