Në një takim të shefes së Zyrës së UNICEF-it në Kosovë, Veronica Vashchenco, me rektorin Arben Hajrullahu dhe dekanin Blerim Saqipi, u kërkuan rrugë e mundësi për vazhdim bashkëpunimi me qëllimin e përmirësimit të sistemit të edukimit dhe mirëqenies së fëmijëve.
Mysafirja Vashchenko, tha se Universiteti i Prishtinës mund të shërbejë si magnet, për të tërhequr të gjitha palët e interesuara që merren me edukimin dhe përmirësimin e jetës së fëmijëve, ndërsa shtoi se edukimi ishte, është dhe do të jetë prioritet i UNICEF-it, duke treguar edhe për përvojën e mirë që UNICEF-i ka pasur me Fakultetin e Edukimit si formë e sigurimit të qëndrueshmërisë së nismave e aktiviteteve.
Fakulteti i Edukimit në Universitetin e Prishtinës në bashkëpunim dhe duke u përkrahuar nga UNICEF-i në Kosovë, është duke zbatuar një sërë aktivitetesh për avancimin e edukimit në fëmijërinë e hershme dhe në sektorin e zhvillimit profesional të mësimdhënësve.
Rektori Hajrullahu paraqiti objektivat zhvillimore të universitetit, prioritetet dhe nevojën e avancimit të praktikave të mbrojtjes dhe mirëqenies së fëmijëve si dhe gatishmërinë për të avancuar bashkëpunimin me UNICEF-in në Kosovë.
Dekani Blerim Saqipi tregoi për zhvillimet dhe reformat e bëra në programet e përgatitjes së mësimdhënësve dhe aktivitetin kërkimor në edukim si dhe propozoi aktivitete të përbashkëta me UNICEF-in dhe akterët e tjerë në fushën e zhvillimit të programeve të edukimit në inkluziv për fëmijërinë e hershme dhe edukimin fillor, fushën e zhvillimit të shkathtësive të buta dhe shkathtësive që kërkohen nga vlerësimet ndërkombëtare, si PISA, si dhe në sektorin e inovacionit me anë të integrimit të teknologjisë në zhvillimin e mendimit kritik dhe inovacionit.
“Fakulteti i Edukimit po bën reformat e duhura dhe po dëshmon sukses në adresimin e debatit të munguar në sektorin e zhvillimit të praktikave të mësimdhënies dhe cilësisë në edukim, duke dëshmuar që edhe në Kosovë ky fakultet po merr rolin si është praktikë në universitete të mira në Evropë që të kontribuojë në një diskurs zhvillimor në sektorin e arsimit”, tha dekani Saqipi.
Rektori Arben Hajrullahu, tha se Universiteti i Prishtinës ka shumë për të ofruar në aktivitetet e përbashkëta me Zyrën e UNICEF-it duke u bazuar edhe në përvojën e mirë të deritanishme, në fushën e mbrojtjes së të drejtave të fëmijëve, ndërsa sugjeroi edhe bashkëpunimin me UNICEF-in për krijimin e programit të shkollimit të mamive në Fakultetin e Mjekësisë së UP-së.
Për ndihmën rreth kësaj çështjeje u pajtua edhe shefja e Zyrës së UNICEF-it në Kosovë, Veronica Vashchenco që në Rektorat erdhi e shoqëruar edhe nga specialistja për edukim, Kozeta Imami. Në takim mori pjesë edhe prodekania për shkencë dhe zhvillim e Fakultetit të Edukimit, Blerta Perolli-Shehu.
Në fund, rektori Hajrullahu, mysafires së tij nga UNICEF-i, ia dhuroi plaketën e Universitetit të Prishtinës. /Kosovatimes/
